Britney Spears a cuminsa celebra su cumpleaño tempran bayendo di biahe cu su fiance Sam Asghari ayera. E strea pop y e actor di 27 aña, a pone un potret unda por wak cu nan ta sunchi otro den un jet priva riba nan Instagram. Britney tabata mustra hopi contento riba e videonan cu Sam a comparti riba su Instagram Stories, unda cu el a presenta Britney cu un bolo den un forma di B pa celebra su cumpleaño.
Riba nan post di Instagram por wak cu Britney ta bisti cu un short cortico, cu el a combina cu un camisa blanco manga largo, y cu su boots elegante di ‘suede’ cora hunto cu su bril aviator. Su pareha, Sam tabata mustra relaha den un T-shirt shinishi, boots y un camisa blanco cu blauw cu el a laga habri.
E actor di 27 aña a skirbi riba su post di Instagram: “Mi ta stima bo mi Lioness, paso mi ta admira bo forsa persistente, mi ta sinti inspira di bo curason bunita, mi ta celebra bo sonrisa cu ta ilumina mi mundo”, e ta sigui: “Tur dia ta bo cumpleaño, mi reina”.
Britney tambe ta zona contento den su caption riba Instagram, unda cu tambe el a highlight su figura riba e foto. El a skirbi; “E alegria bunita di awe!! Ami cu mi comprometi ta asina emociona di bay… mane bo por wak mi no ta pisa 800 liber manera e paparazzi tin mi saca riba e fotonan”. E ta agrega: “Mi ta haciendo ehercicio y e ta real!! Un dia prome cu el a haci aña, e cantante a comparti varios post riba Instagram, incluyendo un fashion show cu tema di celebracion dilanti su kerstboom, unda cu el a mustra su figura fenomenal den varios bisti. Despues den e dia, el a comparti un video tutu di un baby drumi riba un ‘floatie’ den un pool. Britney a skirbi: “Ami ta retira y mi ta gewoon bibando mi bida!!!”, aunke no ta cla si e tabata referi na su propio carera of si e tabata describiendo e video.
E cantante a declara den pasado cu e ta nenga di canta den bibo mientras cu su tata tabata tin su ‘conservatorship’, aunke cu awo e areglo a termina completamente, no ta sigur si Britney ta cla pa bolbe riba stage of den studio. Britney tabata mustra hopi anima den e postnan riba instagram y su videonan, despues cu el a revela cu e ta riba un tratamento nobo di medicina.
