Nan ta bisa cu desayuno ta e cuminda mas importante di un persona su dia! Ora bo lanta di soño, kisas bo a keda sin come pa 10 ora. Un bon desayuno ta yuda bo haya energia y e nutrientenan pa bo curpa. Esaki ta duna bo e energia cu bo mester pa concentra riba bo trabou of na scol. Tin biaha nos ta come e mesun desayuno tur dia, kisas e ta pastechi, kroket, webo cu pan of crackers. Pero aki bo lo haya 3 receta saludabel y diferente pa incorpora den bo desayuno!
1. Overnight Oats
Avena ta un grano cu hopi fibra y antioxidante, tambe e ta hopi versatil! Bo por haci hopi receta cu ne; por traha oatmeal, muffins, pancakes y ‘overnight oats’. Pa ‘overnight oats’ bo mester 4 ingrediente so: ‘rolled oats’, lechi, yoghurt y bo opcion di sucu (honing, sucu bruin of agave).
E proporcion di avena y lechi mester ta 1:1, mas e mita di e yoghurt. Ta mix tur e ingredientenan den un copi y ta lage den frigidaire durante anochi. Por ser creativo y agrega chuculati, fruta of jam.
2. Chia Pudding
Simia di Chia tin hopi fibra, proteina y antioxidante, y e ta abou den caloria! Pa traha pudding di Chia mester 3 ingrediente so, esakinan ta: Chia, lechi y sucu. E ratio ta 1 cuchara di chia y ¼ copi di lechi y e cantidad di sucu cu bo ta prefera. Awo ta mescla tur e ingredientenan aki den un copi te ora cu e simianan di chia ta mescla den e lechi. Ta pone esaki den frigidaire pa minimo 2 ora.
3. Nice Cream
Esaki ta perfecto ora bo tin gana di come un ijscream, pero mas saludabel. Esaki ta hopi facil pa traha. Pa traha e Nice Cream basico, mester un ingrediente so: Bacoba.
Ora e bacoba a hecha un tiki ta pela e bacoba, corte den pida chikito y pone den freezer. Ora e bira duro, ta pone den osterizer y ta mescle te ora e haya e consistencia di un ‘soft serve’. Por pone topping manera strawberries, blueberries, chocolate chips of yoghurt.
