E di diesseis edicion di Focus Digital Magazine ya ta accesibel pa tur su fiel siguidonan via Apple iStore y Android Google Play Store. Despues cu Focus Digital App a haya su acogida absoluto, a sigui avansa unda desde october e revista ta tambe riba e website www.focus.aw. Manera ta di spera cu e edicion di Fin di Aña tin su toke extra special cu e briyo di celebracion. Tur e lectornan fiel di Focus sigur a sa di adapta na e version digital, cu a innova tanto den e concepto di diseño como e parti di e contenido editorial.
Riba e portada di december ta ilustra e beyesa, Alexia Chin, cu a conkista e corona di Reina Internacional de Los Mares y Turismo 2021 na Costa Rica. Un ekipo profesional a logra conhuntamente realisa, cu nan experticio e concepto di e portada pa un luna hopi special. E estilista Roberto Avalo a sa di resalta e bunitesa di Alexia a traves di su makiyahe y peinado, siguiendo e tendencianan logrando asina un look impactante.
E diseñadora Gigliola Gomez a crea un diseño unico pa e portada di Focus Digital di december. Cual el a regala Alexia Chin pa e por luci durante e temporada festivo di Fin di Aña. Un danki special ta bay na Robin Croes, presidente di Miss Youth Aruba, cu a coordina e parti di e vestuario pa e photoshooting. Finalmente un gradicimento pa e fotografo di e miss- y reinanan, Suhaila Alders, cu sa con pa logra saca e miho fotonan.
E edicion di december tin diferente Highlight, cu ta resalta entre otro e enlacenan mas comenta di 2021. E compromisonan mas romantico cu tur detaye di e proposicionnan. Esaki ta un aña cu tanto local como internacionalmente por a mira bek e certamennan di beyesa, cu door di e pandemia nan no a tuma luga, excepto di algun concurso virtual. Janique de Palm ta comparti su experencia na Miss Hispanoamericana, y ta declara ki ta e factor clave pa gana un certamen internacional.
Lo sigui elabora mas tocante e edicion di Focus Digital Magazine di Fin di Aña den e siman venidero. E team di Focus ta gradici tur sosten ricibi durante 2021, y ta bisa: “MASHA DANKI” na tur e fiel siguidonan. E cantidad di ‘active’ download di Focus Digital App a surpasa tur expectativa, y ta representa e ‘hard copy’ aunke den un cantidad hopi mas grandi, mientras e revista riba e website ta forma parti di e plataforma pa alcansa tur grupo.
