E socialite, Ghislaine Maxwell (60), conoci pa su asociacion cu Jeffrey Epstein, a ser declara culpabel di tur cargo menos uno den su huicio pa trafico sexual. Maxwell a enfrenta 6 cargo, acusa pa busca y prepara menornan di edad pa ser abusa door di un adulto, y e delitonan sexual den man di Jeffrey Epstein entre 1994-2004. Maxwell a ser condena pa 5 cargo, cu ta inclui trafico sexual di un menor.
Durante e huicio, cuater hende muhe a testigua cu nan a ser abusa sexualmente pa Jeffrey Epstein ora nan tabata menor di 18 aña. Nan a declara cu Maxwell a yuda Epstein y tin biaha, incluso a participa den e abuso. Maxwell a declara su mes inocente di tur e cargonan. Su abogadonan a insisti cu Maxwell a ser uza pa e manipulador di Epstein como un ‘scapegoat’, ken a comete suicidio na 2019 mientras e tabata sperando su huicio.
E fiscal federal di e distrito di New York, Damian Williams, a emiti su declaracion riba e veridicto cual ta bisa: “Un hurado a declara Ghislaine Maxwell culpabel pa un di e pio delitonan imaginabel: facilita y participa den abuso sexual di muchanan jong. E delitonan Maxwell a comete cu Jeffrey Epstein, su compañero y complice di su bida. E caminda pa husticia tabata demasiado largo, pero husticia a ser haci. El a elogia e curashi di e mucha muhernan adulto, cu a sali for di e sombra scur y a bay den e sala di corte”.
