Un Aña Nobo ta un momento pa reflexiona riba e aña tras di lomba y celebra yegada di uno nobo.  Sin duda hopi ta e personanan cu tabatin diferente reto pa enfrenta durante e ultimo dos añanan, sea cu ta den e parti profesional of personal. E pandemia a cambia e forma con nos ta traha y anda, mirando e distanciamento social cu a hiba nos ta un existencia mas virtual. Sinembargo semper nos tin cu busca e simia di triunfo den cada adversidad pa reinventa pa sigui dilanti. Pa revista FOCUS a surgi e oportunidad pa lansa un proyecto cu ya tabata den pipeline, cu ta e version digital den un concepto mas innovativo di locual den pasado nos a publica como Ezine.

Cu e edicion di Focus Digital Magazine di januari, e ta bira di 17 revista digital cu ta accesibel a traves di Apple iStore y Android Google Play Store. Despues cu Focus Digital App a haya su acogida absoluto, a sigui avansa unda desde october 2021, e revista ta tambe riba e website www.focus.aw. No solamente por download e revista for di cualkier luga cu tin conexion di internet, pero revista digital ta tambe eco-friendly. No uzando papel pa print e revista, ta hunga un rol fundamental den cada rosea riba e planeta.

Manera ta di spera, e prome edicion pa habri un Aña Nobo su contenido ta ilustra e personanan, cu ta un inspiracion tanto pa hoben como adulto. Riba e portada tin e deslumbrante Thessaly Zimmerman, cu su filosofia den bida ta pa nunca perde fe y speransa, semper bay pa e cos cu bo kier den bida y no laga niun hende bisa bo, cu bo no por logre. Thessaly a demostra cu su trabao duro, sacrificio y esfuerso, pa despues di 25 aña Aruba logra clasifica un biaha mas den e certamen di Miss Universe.

Un otro persona cu ta un inspiracion ta CEO di Tourism Corporation Bonaire, Miles Mercera, cu for di su 16 aña, e tabata sa cu e kier a forma su mes den un profesional di turismo. E ta kere firmemente cu ora bo ta soña e soñonan grandi, esaki ta converti den realidad. Un otro ehempel di un persona cu vision, determinacion y profesionalismo, ta Ingeniero Francisco ‘Frank’ Meija, cu desde1995 ta na cabes di su companianan di arkitectura y construccion.

Aña 2022 ta significa pa Jaritza Correa e etapa di crecemento personal y como mama pa prome biaha, pero tambe profesional como Mompreneur. Ta den e faceta pa bira mama, a duna Jaritza ainda mas forsa pa bay pa tur meta, cu el a propone su dilanti den 2022. E resolucion pa e aña aki di Yahaira Maduro ta pa sigui ta activo den arte, cu e tiki tempo cu e tin disponibel. Arte ainda ta un hobby pa Yahaira, cu e ta purba combina cu bida di famia y su trabou como hurista. E escritora, astrologa y animal lover, Yakari Gabriel, ta skirbi con ora bo ta Stima Bestia, bo ta sirbi un Energia Divino.

E prome edicion di 2022 su contenido tin e topiconan y otro highlights, cu ta elabora pensando riba nos fiel siguidonan, cu a sa di adapta na e version digital, cu a innova tanto den e concepto di diseño como e parti di e contenido editorial. E Team di Focus ta gradici tur sosten ricibi durante 2021, y ta bisa: “MASHA DANKI” deseando cada persona “Un Prospero y Feliz 2022”. Focus Digital Magazine ta accesibel via Apple iStore, Android Google Play Store y www.focus.aw (Menu Tab FOCUS DIGITAL)

LEAVE A REPLY

Please enter your comment!
Please enter your name here