E actriz, modelo, ex-reina di beyesa y empresaria Venezolano, Norkys Batista, ta di bishita na Aruba hunto cu su casa Alexis Goncalves, y su yiu homber Sebastián Luttinger. Seis dia pasa el a post riba su cuenta di Instagram cu tin 7.2 miyon di siguido, cu e ta den avion rumbo for di Miami pa Aruba. Norkys a bisa cu e ta feliz di wak bek su mayornan, cu a biaha pa Aruba dos dia despues cu nan a yega Venezuela dia 21 di november. El a pasa e prome Fin di Aña sin ta hunto cu su mayornan y pa nan tambe ta e prome biaha cu nan ta pasa sin ta hunto cu tur nan yiunan. Luis y Migdalis Batista a bin Aruba pa bishita Esther y su famia, cu ta nan yiu menor.
Norkys a bira hopi emocional papiando di su mama y tata, bisando cu e ta haya un ‘nudito’ den su garganta, pasobra apesar cu el a wak nan e poco dianan pa algun rato na Venezuela, ta manera cu e tin hopi tempo sin wak nan. P’esey cada biaha cu un hende papia di su famia, su curason ta krimp, paso su tata y mama ta ‘lo maximo’, p’esey e yiunan mester ta semper cerca di nan mayornan pa cuida y stima nan. E ta feliz di tin su mama y tata bibo y hunto.
Norkys a cuminsa post riba su Instagram for di e momento cu e avion ta bahando riba e pista di Aeropuerto Reina Beatrix. E encuentro familiar tabata yena di hopi alegria y felicidad, unda por a mira Norkys brasando su mama, tata y ruman muhe cu e tin 4 aña sin mira. E mayornan di Norkys ta bay haci dos luna caba na Aruba, y lo keda aki durante un periodo di tres luna pa comparti cu nan yiu muhe di mas chikito y su famia.
