Tempo cu Lynn de Miranda tabata un mucha chikito, e tabata pasa hopi tempo cu su famia na lama ta duik, snorkel y pisca. El a ripara desde e tempo ey caba con nos naturalesa a wordo impacta den un manera negativo. E kier a haya sa dicon esaki tabata pasando, y kico e por a haci pa proteha e flora y fauna di nos islanan stima. Su inclinacion y interes desde chikito, a inspira Lynn pa e escogencia di su estudio, graduando cu un Bachelors Degree den Animal Science y ta den e fase final di su Masters Degree den Biologia Molecular.
Lynn su añanan como studiante na Canterbury Christ Church University na Inglatera tabata yena cu aventura y e momentonan special. E tin bunita memorianan hunto cu su klas den nan biahenan di investigacion na Croatia y Lundy Island. Su topico di estudio ta e efectonan di polucion riba animal marino. Parti di esey ta, cu e ta pasa hopi tempo den su laboratorio haciendo experimento, skirbiendo documentacion pa publica den journal di ciencia, y haci seminario na e conferencianan rond di mundo.
Den edicion di Focus Digital Magazine di maart, Lynn de Miranda ta conta di su desafionan grandi pa finalisa su estudio durante pandemia, unda el a experencia e lockdown na Inglatera, cu tabata un di esnan mas stricto na mundo. Sinembargo manera e oportunidad a surgi, el a biaha pa Aruba hunto su pareha, y durante un sunset George a bay na rudia pa haci su proposion na Lynn. E siguiente paso di Lynn ta pa muda pa un universidad nobo pa cuminsa su estudio como ’Doctor of Science’. Despues di esey nan lo cuminsa planea nan casamento!
Lesa e entrevista interesante di Lynn de Miranda unda e ta conta di e retonan di su estudio y su plannan pa futuro den FOCUS Digital Magazine, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
