FOCUS Digital Magazine di maart ta ilustra riba su portada Elizabeth Johnson, yiu muhe di Ted y Desi Johnson, cu ta bisa cu e ta un previlegio pa lanta den e famia cu e tin. Su mama, tata y dos rumannan, a yude den tur aspecto di su bida pa forma e persona cu e ta awe. Di su mama el a haya e caracteristica di ta espontaneo, y di su tata di ta hopi determina.

Cu e mision pa logra e metanan grandi cu por aporta positivamente na e sociedad, Elizabeth Johnson tin e speransa pa den futuro por defende e hendenan cu a haya un trato inhusto. E echo cu e tin su soñonan ta solamente e ‘tip of the iceberg’, cu mester wordo realisa door di esfuerso y trahando duro.

Actualmente e ta den e prome aña di su estudio di Notarieel Recht na Universidad di Leiden. Elizabeth a lanta den un hogar unda ambos mayor a studia ley y ta trahando den e area aki te cu awendia. Esaki sigur a influencia su interes pa e estudio, pero e ta di hopi importancia p’e, cu e ta scogiendo algo cu e mes tin interes den dje pa studia.

E ta di opinion cu hende muhe y hende homber mester haya un trato igual. Y pa hopi aña caba esaki no ta pasando. Hende muhe semper a wordo mira como e sexo ‘debil’ y ‘incapaz’, un stigma cu e lo kier cambia. Su mama ta un ehempel p’e, cu muher por ta kico cu nan kier ta, el a studia ley, a haya tres yiu y awo tin su carera y su famia.

Un di Elizabeth Johnson su soñonan cu e kier mira realisa ta pa logra di ta un hende muhe exitoso y rico, rico den e sentido di tin experencia di bida, amor, amor propio, sabiduria y felicidad. Lesa e entrevista inspirativo di Elizabeth den FOCUS Digital Magazine, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)

LEAVE A REPLY

Please enter your comment!
Please enter your name here