FOCUS Digital Magazine di april tin riba su portada Marise Maduro, cu su carera den enseñansa a inicia na aña 2002 tempo cu el a caba IPA como maestra di scol basico. Marise semper a yama su mes un ‘forever nerd’, awendia tin e nomber ‘lifelong learner’, y ta gusta inverti den su crecemento y desaroyo personal y profesional. Esey a haci cu aparte di tabata maestra na Colegio Sagrado Curason, e kier a sigui studia. El a completa diferente curso te cu aña pasa el a ricibi su bul di ‘Master of Education in Dutch’.
Marise a haci diferente cambio den su carera como maestra y desde aña 2019 te cu awor ta trahando full time na IPA como docente di practica y Hulandes. E ta describi su mes como un hende muhe independiente, cu un caracter fuerte y determina. E ta hopi positivo y semper ta busca algo bon den cada situacion desagradabel. E ta conta con el a logra recupera y supera depresion y p’esey e ta bisa cu tin nada mas importante cu bo paz y salud mental.
Den edicion di april tin dos bunita enlace matrimonial y cada uno cu su toke diferente. Shanuska ‘Uka’ Koolman y Jo-Anne ‘Joa’ Ras a casa dia 28 di februari 2022 na Bonaire, cu nan celebracion na Aruba dia 5 di maart 2022. Uka a tuma un curashi pa puntra Joa pa casa tempo cu nan tabatin casi haci 5 aña hunto. Nan meta di mas grandi aworaki como pareha ta forma nan famia, aunke cierto hendenan tin un stigma negativo rond di esaki,
E sentimento pa casa di dos biaha pa Civil ta uno di peso pa Gerelin Vrolijk y Edgard Kelkboom. Manera e ley di Dios ta papia di ‘RECONCILIA’ den 1 Korintionan 7:11. E diferencia mas grandi entre e dos enlacenan aki ta, cu esaki ta nan prome biaha cu un ceremonia dilanti Señor. Nan fortalesa mas grandi como pareha ta Señor Cristo Hesus, pasobra si no tabata p’E, nan no lo tabata hunto aworaki. Pa Gerelin y Edgard nan bida ta un testimonio di Señor.
Lo sigui elabora mas di e interesante contenido den e siguiente publicacionnan di FOCUS Digital Magazine, cu entrevistanan entre otro cu Yorleny Oduber- Quesada y su arte di ‘Airplants’, Zuleyka Willems cu ta e prome presidente femenino di Aruba Softball Bond, Marina y Olga Ruiz, mama y yiu cu ta disfruta nan profesion. FOCUS Digital Magazine ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
