E figura di wax di e cantante di 28 aña ta ser exhibi den e Museo de Arte Moderno de Medellín desde awe diamars 26 di april te cu diabierna 29. E exhibicion cu ta den e cinco piso di e museo ta gratis. Segun un comunicado di prensa, e gesto di Maluma ta pa gradici su seguidonan pa e apoyo durante su carera. Esaki ta pa prome biaha cu Madame Tussauds ta presenta un di su estatuanan di wax na Latinoamerica.
“E trabou cu henter e ekipo di Madame Tussauds a crea ta ‘irreal’… E figura ta un berdadero replica di mi y mi ta sinti honra cu nan ta hiba un pida di mi na mi fans prome cu mi concierto”, Maluma a comparti a traves di un comunicado. “Mi ta gradici ambos museo pa colabora y haci di esaki un momento historico unda un figura di wax ta ser presenta na Colombia y na Sudamerica pa prome biaha”.
E elaboracion di Maluma den wax a tuma mas di shen midi pa recrea exactamente e cantante, ken su nomber berdadero ta Juan Luis Londoño. Un total di 20 artista tabata na encargo di e elaboracion di e estatua den nan studio na Londen. Esaki a tuma casi seis luna di trabou. E figura ta luci un suit di Versace y sapato preto di Bottega Veneta. Ademas di Maluma, Madame Tussauds na Orlando tin otro figuranan musical manera Bad Bunny, ken a presenta su estatua siman pasa. Ariana Grande, Pitbull y Ricky Martin tambe ta den e ICON Park.
