SETAR ta orguyoso pa anuncia reapertura di Teleshop Palm Beach cu un edificio completamente nobo y cu diseño moderno. E Teleshop Palm Beach ta remodela den e estilo nobo di SETAR cu un diseño cu ta refleha e naturalesa di nos isla y e simbolo di SETAR como nos compania nacional di telecomunicacion. E clientenan cu bishita e Teleshop por haci uzo di nan “Self-Service Kiosk” pa paga nan recibo of recarga un cuenta prepaid na un forma rapido of tuma asiento pa wordo atendi pa un di nan representantenan.
E Teleshop lo brinda e clientenan un experiencia nobo y moderno. Lo tin un area di “touch & feel”, unda e clientenan por experiencia y tambe wak lo ultimo den celular y acesorionan cu tin na benta. Tambe lo tin un area caminda clientenan por wak television confortablemente mientras ta warda pa wordo atendi y un sofa ekipa cu outlet pa recarga devices y un helpdesk pa asisti clientenan. Ademas bandi di e edificio nobo construi, e edificio bieu di e Teleshop lo bira un cafe unda e clientenan por sinta pa come y bebe algo. Tur esaki y mucho mas den un forma innovativo cu ta unico na Aruba.
Despues di un periodo di trabou di construccion, Teleshop Palm Beach ta cla pa brinda nan clientenan servicio. Teleshop Palm Beach a habri su porta pa publico diamars 26 di april 2022. Alabes, SETAR ta informa cu Teleshop Seroe Blanco a cera definitivamente pa publico desde 25 di april 2022. E clientenan por bishita cualkier di e Teleshopnan rond di nos isla pa tur servicio. SETAR ta invita Aruba completo, en especial e pueblo di Noord, pa pasa admira su Teleshop nobo cu ta habri di dialuna pa diasabra di 9.00 am te cu 5.30 pm.
