E trayectoria profesional di Elizabeth ‘Liz’ Ginocchio ta hopi diversifica, unda el a inicia su carera cu Exxon Chemical na Linden NJ pa despues sigui den enfermeria, graduando den e ramo cu e tabata gusta desde teener. Na 1991 Liz a conoce su casa, Ed, cu su hobby tabata scuba diving y el a namora di e deporte. Hunto nan a cuminsa bishita Aruba y despues a bay Bonaire, caminda nan tabata pasa mayoria parti di tempo sambuyando. Na 1998 nan a muda pa biba parcialmente na Bonaire y cuminsa un resort chikito pa divers, pa despues dicidi pa haci e isla nan cas y Scuba Diving Resort nan negoshi permanente.
Como doño di e resort, el a duna Liz e oportunidad pa ‘diseña’ riba un escala mas grandi, siguiendo su pasion den craft y decoracion. Na 2011 Liz a wordo diagnostica cu cancer y el a bolbe Merca pa tratamento cu a dura 4 aña. Awe e ta gradicido na Dios, su fe y actitud positivo, cu e ta den ‘remission’ pa 10 aña caba. Despues di Liz su tratamento, nan tabata scucha ‘Antiyas’ ta yamando nan atrobe. Durante e tempo bibando na Bonaire, nan tabata bishita Aruba pa vacacionnan cortico. Liz tabata consciente cu e mester cuido medico di calidad y acceso facil pa bolbe Merca si ta necesario. P’esey nan a dicidi di bolbe, pero e biaha aki pa biba na Aruba.
Esey tabata na 2015 cu nan a dicidi di cuminsa un negoshi chikito y e siguiente aña nan a muda pa establece na Aruba. Durante e temporada ey, Liz tabata yuda e propietarionan di Airbnb pa decora y crea un atmosfera agradabel den nan luga. Su estilo a cuminsa bira popular y mas hende tabata puntr’e pa yuda nan. Elizabeth a dicidi di haci diseño di interior su carera nobo. Na 2016 el a atende NY Institute of Art and Design y e aña siguiente a obtene su certificacion di ASID. E tempo ey nan no a establece ainda e negoshi di diseño na Aruba, pero tabata bay bin trahando entre Aruba y Merca cada 2 siman pa haci compra pa su clientenan, y ta corda cu esaki tabata un locura.
E momento ey, Liz tabata wak tambe un aumento hopi grandi di un ‘forma’ nobo di clientela. Esunnan cu tabata kier conseho di diseño, pero cu kier pa nan ordo hopi di e articulonan for di Merca. Esaki a bira alrededor di cincuenta porciento di su negoshi. Despues a crea Upcycle Design VBA, cu den nan business plan ta pa forma un tienda, cu lo trece mercancia di calidad halto, sostenibel y ‘upcycled made’ pa Aruba. E gran apertura di Upcycle Designs Aruba situa na Caya Taratata #3 dia 22 di januari 2022 tabata un exito grandi.
Den edicion di Focus Digital Magazine di mei por lesa e entrevista cu Elizabeth ‘Liz’ Ginocchio cu ta splica dicon – ‘Upcycling’ ta un forma di biba – y cua tabata e desafionan creando e concepto di Upcycle Designs Aruba. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
