Un portada elegante y glamuroso pa e edicion di Focus Digital Magazine di juni cu e pareha, Marc Anthony Agrela do Nascimento y Nicole Coto. Despues di a conoce otro a sigui e prome ‘date’ cual tabata na CB Smith Park na Pembroke Pines. E tabata un Mini Golfing sigui pa un dinner. Un fun fact di e dia aki tabata cu Nicole a pasa casi den luz cora. Durante un vacacion cortico na Las Vegas despues di 1 aña y 11 luna cu nan a conoce otro, Marc a propone matrimonio na Nicole den un forma magico. Nan a celebra nan union matrimonial dia 22 di april 2022 na Half Moon Bay na California, cu ta e estado faborito di Nicole. Marc y Nicole ta comparti algun detaye hopi special di nan compromiso y matrimonio den e revista di e luna aki.
E Prome Santa Comunion ta un di e celebracionnan cu tin un significacion hopi special den e seno di e famia Catolico. E ta un motibo di felicidad pa e muchanan y nan sernan keri, cu ta acompaña nan durante e bunita ceremonia aki. E ta un dia cu ta keda graba pa semper den nan curason. E mayornan di Athina y Viva Fernandez, Marcello Petrocchi y Crystalyne Kock, a yega di comparti cu FOCUS algun di e momentonan cu tin un significacion hopi special. E ocasion aki ta un otro experiencia extraordinario, cu ta e Prome Santa Comunion di nan yiu(nan).
Ademas di e celebracionnan special y memorabel den edicion di juni, tin un highlight cu Giovanny Geerman cu tin e rol di tata y mama alabes. E beyesa Zury Ruiz cu ta bisa dicon e ta merece loke el a logra na Egipto. Un inspiracion ta e hoben di 13 aña di edad, Anaël Misiedjan, cu su logro impresionante di 33 medaya den su deporte di turnen y awo den apenas dos aña cu landamento sincronisa. E artista Gustavo Nouel cu ta apoya e intercambio cultural di pintamento di ‘street portraits’ logrando e mes hopi exito riba e plasanan renombra cu su arte.
Lo sigui elabora mas di e interesante contenido FOCUS Digital Magazine di e luna di juni den e siguiente posts durante e dianan venidero. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
