Giovanny cu ta conoci pa su nomber di cariño, Gio, a crece sin e figura di un tata y semper el a haya falta di esey den su bida. Awe e tin e rol di ta mama y tata alabes di su yiu homber Amzi Liam. Ser tata ta e experiencia di mas bunita cu a pasa den su bida, y su yiu ta tur cos p’e. Gio ta dedica su tempo na Amzi despues cu e caba di traha y den fin di siman cu e ta liber.
Gio su reaccion dia cu el a haya sa cu e lo bira tata: “Mi wowonan a yena cu awa y a bira hopi emociona e momento ey. Mi ta corda cu mi core yama diferente instancia pa haya mas informacion con e procedura ta bay”. E ta bisa cu no ta facil pa tin e rol di tata y mama alabes, paso tur e responsabilidad ta cay riba dje so. Ademas hopi biaha e no tin tempo p’e mes.
Den edicion di Focus Digital Magazine di e luna aki, por lesa e entrevista cu Giovanny ‘Gio’ Geerman y su conseho na e tatanan, cu ta ausente den bida di nan yiunan. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
