Olivia Newton-John, e superstar ganadora di Grammy cu a reina cu su musica pop, country y adulto contemporaneo y dance charts, cu exito grandi manera “Physical” y “You’re the One That I Want”, cu a gana incontabel curason como Sandy di e exitoso pelicula “Grease” a fayece. Na mei 2017, Olivia a anuncia cu e tabatin cancer di pecho cu metastasis den weso, y el a fayece awe na edad di 73 aña.
Dame Olivia Newton-John a fayece keto den su ranch na Southern California awe mainta, rondona pa su famia y amigonan. E casa di Olivia, John Easterling, a pidi a traves di su rednan social pa tur hende respeta e privacidad di e famia durante e momentonan asina dificil.
“Olivia tabata un simbolo di triunfo y speransa compartiendo su biahe cu cancer di pecho. Su inspiracion curativo y su experiencia pionero cu mata medicinal ta continua cu Olivia Newton-John Foundation Fund, dedica na e investigacion riba mata medicinal y cancer. Na luga di flor, e famia ta pidi pa haci donacion na su memoria na @onjfoundation“. Esaki ta e mensahe cu e casa di Olivia Newton John a comparti riba su rednan social.
