E cantante Shamiro Anita a caba di lansa special pa su concierto ‘Sigui pa Dilanti’ su cancion nobo y yen di alegria titula ‘Djis Hari’ , cu ta combina cu su videoclip. Den e videoclip aki por mira e bailenan y hendenan contento estilo ‘Djis Hari’ yena cu alegria den Punda, Otrabanda y riba e bunita Ponton Brug. E cantica nobo aki sigur lo kita un peso y crea alegria den curason y cas di hopi hende. Letra di e cantica ta bisa entre otro cu: “Ni maske mi tin dolor, ami lo hari. Señor lo cuida semper di mi. Mi ta mas cu un vencedor. Dios lo guia mi. Señor lo bringa mi caso pa mi”.
E mensahe di e cantica nobo ‘Djis Hari’ ta mustra cu Dios kier pa nos ta contento hasta ora den bida nos hansha, rabia, desmotiva, cunsumi, spanta, bira tristo, cay den depresion, sinti nos insigur, etc. Cu e cantica nobo aki Shamiro ta motiva y recorda nos pa den un caso asina nos mester keda trankil, hala Un rosea, djis hari y haci oracion pa Dios yuda nos ‘Sigui Pa Dilanti’. P’esey Shamiro a lansa e cantica y videoclip nobo ‘Djis Hari’ aki special pa su Gran Konsierto ‘Sigui pa Dilanti’ combina cu Shownan espectacular cu lo tuma luga dia 1 october den PWFC na Corsou.
Den e Gran Konsierto & Show aki henter famia lo disfruta di Shamiro su hitnan manera: ‘Move Tur Montaña’ – ‘No Soy Igual Que Ayer’ – ‘Un Brasa so Mi Ke’ – ‘Esta Un Dushi Dia’ – ‘Guiame’ – ‘Sigui Pa Dilanti’ – y awo ‘Djis Hari’ tambe. Lo bay tin tremendo canticanan, light show, baile, laser show, drama, potpourri y hopi sorpresa mas. Shamiro su mensahe ta cu no ta importa kico bo ta pasando aden, bo tin ku djis hari paso bo sa cu tur cos ta bay ta bon na final, door cu bo confiansa ta den Dios.
Shamiro ta gradici Dios na prome luga y tambe tur hende cu ta sostene, wak y/of scucha su musica. Su peticion ta pa sigui comparti su musica cu tur famia, amigo y conoci. Su oracion ta pa mas y mas hende rond mundo keda bendiciona pa medio di e mensahenan positivo di Dios den su musica. P’esey e ta invita tur hende grandi y chikito pa scucha/wak su musica y ban alaba Dios hunto, gosando den un dushi ambiente yena cu paz y alegria dia 1 october den su Grand Konsierto ‘Sigui pa Dilanti’. Riba Youtube na https://www.youtube.com/watch?v=yMROGBPqWuU por wak e videoclip nobo aki titula ‘Djis Hari’ aki di Shamiro y/of tur su otro videoclipnan buscando Shamiro Anita.
