Tur aña Organisacion Mundial di Turismo (UNWTO) ta scoge un tema pa enfoca riba dje pa dia Mundial di Turismo. E tema pa e aña aki ta ‘Rethinking Tourism’. E meta di e tema aki ta pa entre otro amplifica e mensahe cu turismo tin un forsa inspiracional y transformativo y na mes momento identifica solucionnan pa realisa e potencial di turismo como vehiculo pa recuperacion y transformacion pa asina por realinia turismo pa futuro.
No ta un secreto cu e ultimo añanan a trece hopi reto pa e industria turistico mundialmente, unda na un dado momento turismo a yega practicamente na un paro completo. Hopi destino a realisa e poder, importancia y posibilidad cu turismo ta trece y awor ta e momento perfecto pa pensa den ki direccion turismo lo bay. Den caso di Aruba, nos tur ta consciente con importante turismo ta pa nos isla y nos hendenan y ya pa decadanan nos ta duna turismo e atencion necesario pa e por sigui florece.
Mirando e retonan di 2020 y 2021 mester reconoce cu un di e puntonan clave di exito di recuperacion di turismo na Aruba tawata e habilidad cu nos a demostra como destino pa por cambia, adapta y sigui bay dilanti. E resiliencia den nos DNA, a pone cu nos a para bek riba nos pia y entre otro logra prepara debidamente pa un reapertura di frontera como un di e promenan den nos region.
Como destino, Aruba semper tawata conoci pa tin socionan riba tur nivel cu ta traha hunto como e ‘Team Aruba’, tanto den sector publico como priva. Durante e momentonan di mas dificil e cantidad di socionan cu mester a traha hunto, den algun caso pa prome biaha, a bira mas grandi ainda. Guia pa un impulso interno y e speransa di un comunidad completo cu tawata warda anciosamente pa cosnan cuminsa bay bek den e direccion normal, miembronan di ‘Team Aruba’ a logra crea den tempo record oportunidadnan nobo pa bishitantenan por yega Aruba bek y consecuentemente pa nos industria por cuminsa recupera tambe.
Aruba a enfoca hopi riba mensahenan relata na felicidad semper y na un dado momento a cambia e enfoke di mensahenan pa comunica tambe riba siguridad, medidanan y protocolnan pa por atrae bishitantenan cu tawata tin otro prioridadnan compara cu bishitantenan den pasado. E comunicacion aki sigur tawata elemental pa e recuperacion cu Aruba a logra.
Den transcurso di añanan y mas ainda den e ultimo dos añanan, bishitantenan a cambia unda no solamente e calidad di e servicio y producto ta importante pero tambe tin necesidad pa e destino por ofrece experiencianan unico y ofrece ‘balor pa e placa cu ta paga pa un vacacion’. Cada dia esaki ta birando algo mas importante. Pa e motibo ey e “Aruba Signature Experience” a wordo crea y ta un ehempel di con A.T.A. ta encurasha creacion di experiencianan diferente pa e bishitantenan.
Mirando e cambio den loke ta importante pa bishitantenan, algun luna atras A.T.A. a lansa e campaña di mercadeo nobo “The Aruba Effect”. E campaña ta mustra cu mas cu algo tangibel, di un forma intangibel Aruba ta transforma bo una bes bo bin di bishita y Aruba ta keda cu bo ora bo bay bek bo cas. E campaña aki ta parti di A.T.A. su strategia di mercadeo y e diferente elementonan ta yega cerca e bishitante den diferente momento mientras nan ta haciendo nan escogencia di biahe.
A.T.A. lo sigui enfoca riba agilidad y lo traha pa Aruba por sigui desaroya den un forma sostenible y inclusivo, uzando e modelo “High Value Low Impact”. Aki A.T.A. ta considera e contribucion economico di turismo, e calidad di e experiencia di e bishitante, e proteccion y conservacion di naturaleza y medioambiente y e calidad di bida di residentenan. E modelo aki ta importante pa por yega na resultadonan economico di balor halto, ofrece un vacacion di balor halto, contribui na un calidad di bida na nivel, mientras cu ta minimisa e impacto negativo cu turismo por tin riba e isla.
Ta premira cu Aruba por ta yegando cerca di un recuperacion completo den cantidad di bishitante compara cu 2019 na fin di e aña aki y tambe ta premira un cantidad di ‘Tourism Credits’ mas halto cu na 2019, algo sumamente satisfactorio.
E exito aki di Aruba ta danki na tur persona cu a contribui y no a rindi maske no tawata facil. E exito aki ta danki na cada persona cu di un of otro forma ta traha den e industria di turismo y ta hiba nan mes, nan famia y Aruba dilanti. Danki!
Feliz Dia di Turismo
