![](https://focus.aw/wp-content/uploads/2022/11/Cover-Focus-Digital-298-10-587x1024.jpg)
Enfocando riba su crecimento personal, futuro y compania, ta e fase di bida unda Kimberly Wever ta na e momentonan aki. E ta trahando riba diferente proyecto grandi y tur p’e ta experiencianan nobo, p’esey e ta sinti cu e ta evolucionado. Nunca el a pensa di ta den e mundo di negoshi maske e ta bin di un famia di entrepreneurs, sinembargo e ta considera su mes un artista prome y un negoshante despues.
![](https://focus.aw/wp-content/uploads/2022/11/Kimberly-Wever-5-683x1024.jpg)
Zsazsa Designs a nace di un admiracion pa artesania traha na man. E ta mira atras un decada di hopi siñamento, erornan cu a wordo cometi y hasta e sintimento di ‘give up’ a surgi na cierto momento. Kimberly ta hopi agradecido na su mayornan cu semper a apoye den tur locual cu e kier a haci. Su tata ta Arubiano y su mama ta Colombiano, y e ta orguyoso di ambos cu cada uno tin nan mesun negoshi pa mas di 30 aña caba.
![](https://focus.aw/wp-content/uploads/2022/11/Kimberly-Wever-3-683x1024.jpg)
Locual cu ta anima Kimberly como artista ta creando un diseño cu solamente ta biba den su cabes. Di dos ta su biahenan cu e ta haci rond di mundo, e mix di color y forma cu ta autentico na cada pais, treciendo hunto creando autenticidad. Su motivacion ta su clientenan cu ta gusta su arte. Un di e top motibonan pakico e ta sigui traha joya ta pa haci nan orguyoso di e marca cu cada pieza cu e ta traha.
![](https://focus.aw/wp-content/uploads/2022/11/Kimberly-Wever-4-683x1024.jpg)
Den Focus Digital Magazine di e luna di november, Kimberly Wever ta conta di su trayecto como artista y negoshante, y loke e ta spera di 2023. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)