E edicion di Fin di Aña di revista Focus ta impacta un biaha mas den su estilo autentico awo atrabes di su version digital cu ta cruzando tur frontera. Durante e trayecto di Focus hopi ta e parehanan cu a comparti nan momentonan di felicidad dia di nan enlace matrimonial. E aña aki a keda celebra algun boda magico tanto na Aruba como ‘destination weddings’ y Focus ta ilustra tres boda sumamente bunita den edicion di december.

Riba e portada ta ilustra e pareha artistico, C-Zar Olarte & Chelsea Peterson, cu riba mesun fecha 1 aña despues di nan compromiso riba beach cu un bunita bahada di solo bou e tononan musical di mariachi, ta intercambia nan promesanan di amor. Nan kier a simbolisa e dia ey pa ta e dia di nan amor y tur loke a pasa riba e fecha ‘19-11-22’ lo keda graba den nan curason pa semper. Tur dos ocasion tabata algo asina special cu nan nunca lo lubida y cu nan kier a bibe pa tur aña largo riba e mesun fecha pa resto di nan bida.

For di e prome biaha cu Jair Oduber & Militza Gietel a bishita Medellin nan a keda namora di e ciudad. Mas special el a bira ora nan a compromete na e ciudad aki di eterno primavera. Prome cu Jair y Militza a subi avion pa bay Colombia nan a keda declara oficialmente como Sr. & Sra. Oduber na Aruba. E ceremonia na misa tabata uno hopi special door cu e tabata uno ‘ecumenico’, E pareha a ricibi nan bendicion for di Pastor Catolico y Dominee Protestant como cu Jair ta Catolico y Militza ta Protestant. E ceremonia simbolico na Medellin tabata special den e sentido cu nan a scoge pa efectua e ritual di santo y di candela pa seya nan union.

Tur e momentonan durante e celebracion matrimonial di Christian ‘Chris’ Romero & Aileen Kelly tabatin su parti memorabel y super special pa ambos. E famia y amigonan cu a biaha pa Colombia pa ta presente na e bruid a haci henter e experiencia uno maraviyoso, unda e invitadonan a join tambe na diferente actividad cu nan a organisa. E estadia tabata hopi dibertido compartiendo cu Christian y Aileen, un pareha cu tin un personalidad energetico y humoristico. E tabata hopi preparacion y coordinacion pa realisa un ‘destination wedding’, pero nan a keda contento cu nan celebracion a resulta manera nan a spera.

E parehanan aki ta comparti e momentonan memorabel di nan union matrimonial den Focus Digital Magazine di december cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)

LEAVE A REPLY

Please enter your comment!
Please enter your name here