Lisa Marie Presley, cu a muri ayera despues di a sufri un hartstilstand na e edad di 54 aña, tabatin un bida yen di pena y desafio, pero specialmente su ultimo añanan. Un mucha muhe chikito bunita, cu a nace for di e union di e legendario Elvis y su casa Priscilla Presley na 1968, ken su imagen a ser comparti pa henter mundo prome cu por a pronuncia un palabra. E famoso ‘golden couple’ a separa ora Lisa Marie tabatin 4 aña y su tata a muri tempo cu e tabatin 9 aña. El a crece bou su sombra mientras e tabata carga cu e responsabilidad di su enorme legado. El a declara cu el a ser abusa sexualmente pa e guy di su mama durante tres aña desde su 12 aña. E tabata uza droga ora e tabata un teener y cu su 17 aña el a drenta un programa di tratamento pa adiccion di Scientology. Aunke si e tabatin un asociacion cu e organisacion, despues el a corta tur laso cu nan.
Henter e bida di Lisa Marie a transcuri den publico, a pesar di no a inicia su carera musical te cu 35 aña. E tabata e cuminda constante di e tabloids cu su mirada fuerte, hereda di su tata, riba e portada di e revistanan. Su hopi matrimonio y divorcionan riba e titularnan, cuatro den total, tambe a alimenta e redonan. Su prome casa tabata e musico Danny Keough, cu a sigui ser un amigo di henter su bida. Mas despues el a casa cu un amigo di infancia y leyenda musical Michael Jackson (1994 pa 1996), e actor Nicolas Cage (durante tres luna na 2002) y e productor musical Michael Lockwood (2006 pa 2016). E prome y ultimo union a duna como resultado su yiunan: su yiu muhe cu ta actriz, Riley Keough, di 33 aña, su yiu homber Benjamin Storm Keough, cu a muri na 2020 cu 27 aña y su yiu muhenan morocho, Harper Vivienne Ann y Finley Aaron Love Lockwood, di 14 aña.
Lisa Marie a atende Golden Globes dos dia prome di su morto, apoyando Elvis y e actor cu a interpreta su tata, Austin Butler, cu a gana pa su actuacion. E tabata mustra delicado, y tabata wanta na e amigo di su tata, Jerry Schilling, durante e entrevistanan riba red carpet. Su discurso tabata parce mas lento cu normal y paden di e evento el a trompica segun un asistente a bisa. Dos dia despues, e dia di su morto, el a keha di dolor di stoma mainta tempran, y poco despues su housekeeper a haye for di tino. Su ex-casa Danny, cu ken e tabata biba a dune CPR te ora e paramediconan a yega y a transporte pa hospital. El a ser poni den ‘medically induced coma’ y ‘life support’, muriendo algun ora despues. E famia a laga bon cla cu su morto no tabata un suicidio. Su tata y su wela di parti tata tambe a muri door di ataca di curason na edad jong: 42 y 46 aña respectivamente.
E representante di su yiu muhe Riley Keough a confirma na Yahoo Entertainment, cu e cantante y unico yiu di Elvis Presley su ultimo luga di descanso ta na e propiedad di su difunto tata na Memphis, Tennessee. E sitio ta banda di su yiu stima Ben cu a muri na 2020. Ben tabata Benjamin Keough, yiu di Lisa Marie y Danny Keough, su casa for di 1988 pa 1994. Ben a comete suicido tempo cu e tabatin 27 aña.
