Lava Aruba Glass Studio ta forma parti di un tradicion familiar desde mas di cinco decada. Na 1957 a ser funda ICET Arte Murano na Venezuela, cu e idea pa traha cu e tecnicanan di ‘glassblowing’ di mesun manera cu el a ser haci na e isla di Murano desde mas di ocho siglo, cu e mesun metodonan uza pa e artesanonan di Venecia.
Cu e filosofía ey como tambe cu e mannan di e artistanan y ekipo treci for di Italia, a cuminsa cu e magia di e bunita arte aki cu a dorna miles di hogar Venezolano cu elegancia, beyesa y estilo durante varios generacion. Awendia e tradicion y experiencia ta yega Aruba, compromete pa ser un fenomeno unico cu ta semper na vanguardia di e industria di ‘glassblowing’.
E beyesa di e piezanan, e proceso maraviyoso y habilidad asombroso di e MAESTRONAN ta haci di e practica di creacion di e piezanan di glas un actividad unico pa agrega na e circuito turistico y e bida cultural di Aruba. E ta un oportunidad unico na Lava Aruba Glass Studio, unda nan ta habri nan portanan pa presencia e artesania di e maestronan di glas y pa admira con nan ta duna un obra di arte bida.
E artista di arte Murano, Luca Vidal, cu ta posiciona riba Top 5 Mundial tabata invita pa demostra su increibel habilidad artistico na Lava Aruba Glass Studio. Maestro Vidal a presenta dilanti un grupo selecto di invitado, cu ta aprecia y apoya arte, su maraviyoso tecnicanan creando piezanan unico y perfectamente elabora.
Manera mayoria di e artistanan di murano, Luca Vidal tambe a cuminsa hoben cu su 14 aña siñando e arte di glas, trahando band’i e maestro di imperio Rossi. Pa maestro Vidal e sensacion pa mira finalisacion de cada pieza tin varios sensacion, specialmente e emocion di wak e producto final manera cu e ta termina. Den edicion di Focus Digital Magazine di februari por admira Luca Vidal durante e proceso pa elabora su obra di arte, cu potret y video di Aruba Photo and Films. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL)
