Durante gran parti di Kathleen Daliva su infancia el a pasa tempo mirando otro artistanan. Un di nan tabata su tata, cu e tabata observa con e tabata crea arte y el a haya deseo di haci mescos. E idea cu e tabatin tabata pa por crea algo cu otro hende por haya fascinante y e por bisa cu orguyo: “Yes! I made that!”. Despues ora e tabatin 11 aña, el a dicidi cu arte ta loke e ta bay haci como su carera. Su mayornan y su ruman homber mayor ta di Filipinas, pero Kathleen a nace na Aruba.
Kathleen Daliva a cuminsa tuma workshop na Ateliers ’89 aña pasa. E momento ey, e unico medio artistico den cual el a profundisa tabata pintamento. Despues el a adkiri mas experiencia den otro medionan, manera film y 3D sculpture. Kathleen su experiencia na Ateliers ’89 Punto di Beyas Arte Aruba ta uno hopi positivo, y e ta agradecido semper na Elvis Lopez pa e guia cu el a ricibi di dje y na e maestronan di e diferente workshop cu el a asisti, pa asina e por a bira un miho artista.
Kathleen actualmente ta atende Educampus Aruba y pa su estudio den arte avansa e ta planea pa aplica na Rietveld Academie na Amsterdam. Conoce un poco mas di Kathleen Daliva den Focus Digital Magazine di mei, cu ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
