E ultimo lunanan Jairo Erasmus tabata hopi den spotlight pa su logronan den e mundo di moda internacional. Un diseñador Arubiano cu ta bibando ya pa 25 aña na Puerto Rico, unda e ta propietario di Erasmus Atelier & Art College na e municipio di Toa Alta. E mesun luga unda nan a celebra grandemente e coronacion di Dayanara Torres como Miss Universe 1993.
E aña aki ta net 30 aña pasa cu Dayanara a trece e corona universal pa su pais, cu a yena tur Portoriqueño cu orguyo y alegria, pero principalmente su pueblo natal, unda e ta un di e personahenan ‘Ilustre’ na Toa Alta. Mescos cu a pasa na 1993, e pueblo di Toa Alta a reuni pa celebra y duna homenahe na Dayanara Torres.
Durante e celebracion grandi riba e plaza publico, Miss Universo 1993 a ricibi un bunita regalo, cual ta un replica di e trahe cu el a gana na Mexico. Un momento emocionante tanto pa Dayanara Torres como Jairo Erasmus, cu realisa e replica di e trahe di gala. Jairo ta conta con tur cos a cuminsa den su entrevista den Focus Digital Magazine di juni, cu ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
