Rikkie Valerie Kolle, di 22 aña a gana e titulo di Miss Netherlands y lo participa na e certamen di Miss Universe na final di e aña aki na El Salvador. Miss Netherlands ta bira e segundo candidata abiertamente transgenero den e competencia, despues di e modelo Spaño, Angela Ponce, na 2018. Miss Kolle su obhetivo ta pa ser un bos y un role model, y el a bisa cu e miho cu niun otro hende sa kico ta sinti bo so y no ta rondona solamente pa e pensamentonan positivo.
E modelo y actriz, Rikkie Valerie Kolle, di Breda a obtene e titulo di e concurso diasabra despues di a impresiona e hurado cu su storia fuerte y mision cla. Esaki ta e prome biaha den historia di e competencia cu un muhe transgender ta gana e concurso di beyesa Miss Netherlands. Rikkie anteriormente a participa den Next Top Model di Hulanda. Tempo cu Rikkie Valerie Kolle tabata Rik y cu el a sali afo como transgender, e no tabata facil y e tambe a sufri. El a añadi den su profile di concursante cu a traves di su compromiso y forsa ta spera di logra un cambio den e sociedad.
E concursantenan transgenero por a competi den e certamen di Miss Universe desde 2012, tempo e tabata propiedad di ex-presidente Mericano, Donald Trump. E concurso awo ta propiedad di e empresario Tailandes y reality star, Anne Jakkapong Jakrajutatip, cu ta tambe transgender. El a cumpra e empresa na 2022 y el a priminti cu e no ta solamente continua cu su legado di brinda un plataforma na e personanan apasiona di diverso origen, cultura y tradicion, sino tambe desaroya e marca pa un proximo generacion.
