E aña aki por presencia un eleccion bek pa eligi e proximo Miss Universe Aruba, cual ta tuma luga diasabra awo den Renaissance Convention Center. E anochi aki cinco candidata ta bay competi pa scoge e representante di Aruba pa e certamen di Miss Universe 2023 na El Salvador. E organisacion di Miss Universe a introduci e aña aki cambionan grandi cual ta trece hopi reto cu ne. For di e proximo certamen ya e candidata su midi y estatura no ta relevante mas pa e sobresali. Ademas di esey awo tambe hende muhenan casa, divorcia of cu yiu por competi tanten cu nan ta legalmente reconoci na nan pais como hende muhe.
Na Aruba e cambionan aki a ser ricibi cu entusiasmo y segun Anoutcka Koolman-Burleson, National Director, e positivismo ta resalta pa e trabounan cu a inicia desde juni. E concepto di trece e publico mas cerca di e eleccion pa medio di un ‘reality’ show, a wordo ricibi cu man habri cerca e comerciantenan. A base di e cambionan den Miss Universe e lesnan a ser duna, esey kiermen a enfoca hopi na contenido, forma di papia y tambe na actividadnan social. Importante ta cu awendia un miss ta encera cu e mester carga hopi mas responsabilidad di loke hende por imagina.
Riba e escenario na Renaissance Convention Center lo bay tin cinco candidata cu sin duda tin e cualidadnan pa ser corona Miss Universe Aruba 2023. Den edicion di Focus Digital Magazine di augustus por haya sa un poco mas di Milenka Janssen, Lorainne Oduber, Anaisa Orman, Gavriëla Bozo y Karol Croes. Exito na e cinco beyesanan aki diasabra awo pa e conkista di e corona maximo di beyesa.
