Aruba Tourism Authority (A.T.A.) ta mira bek na un fin di siman grandi pa loke ta trata arte, creatividad y cultura na Aruba. Durante tres dia largo, San Nicolas a bira e punto central pa tur amante di arte na Aruba cu a bini hunto pa celebra di 6 edicion di Aruba Art Fair.
E aña aki atrobe Aruba Art Fair a presenta obranan di arte impresionante riba e murayanan den cayanan di San Nicolas. E obranan di arte mural a wordo realisa pa artistanan renombra for di varios parti di mundo y di Aruba tambe. Entre otro a conta cu participacion di artistanan manera Adry del Rocio di Mexico, Chemis di Republica Checo, Fio Silva di Argentina, Mr Dheo y Odeith di Portugal, Faunagraphic di Inglatera y Bubblegum di Spaña. Artistanan local cu tambe a haya e oportunidad pa desplega nan talento tabata entre otro Elisa Lejuez Peters, Elvis Tromp, Omaira Silva, Paul Wong y Robert Solognier, y tur otro artista envolvi cu den un of otro manera a presenta nan arte y talento cu a yuda na eleva e evento.
A.T.A. por mira bek riba un partnership importante cu Aruba Art Fair. E promocion di arte y cultura ta hopi importante pa A.T.A. y Aruba Art Fair ta un di e eventonan cu ta duna e oportunidad perfecto pa logra esaki. Tur cos a cuminsa na aña 2017 di un forma chikito y organico. Poco poco e evento a sigui crece y a sa di transforma San Nicolas den e Capital di Arte di Caribe – un atraccion importante tanto pa nos localnan como tambe nos bishitantenan.
E impacto di un evento manera Aruba Art Fair ta extende mas aya cu simplemente un fin di siman yen di actividad, ya cu e murayanan ta keda visibel y accesibel durante henter aña. Cada persona cu bishita e area aki por biba un experencia cultural memorabel. Ademas, cada persona cu saca potret y comparti esaki riba rednan social ta yuda inspira otronan pa bishita nos isla y particularmente e area di San Nicolas, asina promoviendo nos isla como un destinacion cu tin aprecio pa arte y cultura.
 ta mira bek na un fin di siman grandi pa loke ta trata arte, creatividad y cultura na Aruba.){kind=link}