Ayera nochi e estilista Roberto Avalo a yega Corsou como parti di e team di Ambar Ursulita Tovar, e representante di Corsou na e certamen di Miss Teen Mundial 2023. E concurso ta inicia awe 24 september y lo tin diferente actividad durante henter e siman, cual lo finalisa otro fin di siman riba diasabra cu eleccion di e sucesora di Mariona Juncosa di Republica Dominicana cu a gana aña pasa. E concurso ta organisa pa Francisco Cortez di El Salvador y esaki ta edicion #9 di e certamen cu e aña aki tin Curaçao como sede.
Roberto Avalo ta preparando Ambar Ursulita Tovar, ken el a conoce durante e certamen na Corsou, unda e tabata hurado pa scoge Miss Teen Curaçao 2023. Despues di e eleccion e oportunidad a surgi pa Roberto haci e parti di estilismo pa Ambar Ursulita, cu su preparacion tanto na Aruba como na Corsou. Pa Roberto e ta un great experiencia pa forma parti di e tremendo ekipo di Miss Teen Curaçao, cu ta un mucha muhe hopi determina, sabi y bunita, ken ta su di 15 candidata cu e ta prepara pa un competencia internacional.
E reto mas grandi cu Roberto Avalo mester a surpasa ta seguramente pa conoce e candidata y crea un bond pa asina inspira e look perfecto pa su personalidad y locual ta desea pa proyecta. Roberto ta conta cu el a yega Corsou ayera nochi 9’or y nan a cuminsa cu e makeover pa loke ta bira e look di Ambar Ursulita Tovar pa e certamen. Pa yega cu un idea den su mente y por realisa esaki den poco ora tabata un reto sigur grandi, pero nan a logra y e ta super satisfecho cu e resultado.
Roberto Avalo a comparti algun detaye di e participacion di Miss Teen Curaçao pa locual ta e vestuario exclusivo cu e lo bay luci durante e actividadnan y anochi final. “Ambar no lo bisti niun paña cumpra den boutique, pero un coleccion grandi di diferente diseñador internacional, cu designer di Miss Venezuela, Vietnam, Aruba y uno internacionalmente reconoci cu no por revela su nomber ainda. Su maletanan ta cu diseñonan bunita, luhoso y diferente”. Roberto a sigui bisa: “Mi ta hopi ‘excited’ cu e oportunidad aki vooral cu ta aki na Corsou, unda mi ta purbando pa crea un nomber tambe bayendo un poco mas afo di Aruba”.
E diseñador di Aruba cu ta forma parti di e tremendo ekipo di diseñadornan di e trahenan di Miss Teen Curaçao ta Andrew Steba, cu nos por a mira caba su creacionnan espectacular den e reciente certamennan di beyesa na Aruba. Esaki ta sigur un oportunidad grandi pa Andrew Steba riba un plataforma internacional como diseñador, unda sigur e lo sa di laga un tremendo impresion atras cu su creaccionnan. Miss Teen Mundial cu Curaçao como sede lo pone e pais den spotlight internacional mirando cu e ta un concurso hubenil cu a sa di posiciona su mes como un prestigioso certamen di beyesa internacionalmente.
