Apesar cu Amelia Elskamp tabatin solamente un luna di preparacion prome cu el a sali pa Corsou pa competi den e certamen di Miss Teen Mundial por mira con e ta briyando memey di e otro participantenan. Ora Amelia bisa e tempo cortico cu el a prepara, e hendenan ta keda sorprendi door cu na tur actividad e ta sobresali y presenta su mes di un forma unico. Ademas di esey Amelia ta un mucha muhe social, simpatico, autentico y inteligente, cu por hiba un combersacion interesante y ameno.
E persona clave den e participacion di Miss Teen Mundial Aruba ta Robin Croes, ken ta e director y acesor di imagen di Amelia, cu ta coordina tur su outfits cu e ta bisti na cada actividad. Hunto cu Robin tin como parti di e team na Corsou, e makiyador Pierre Thielman y hair stylist Alan Kock.
E trato cu nan ta hayando ta super bon y e organisacion ta hopi atento cu tur detaye di nan estadia. Robin a bisa tambe cu el a gusta cu nan a haci un reunion cu tur e directornan y estilistanan pa splica kico Miss Teen Mundial by Francisco Cortez ta buscando. Nan a mustra di ta dispuesto pa scucha cuakier critica constructivo sin niun inconveniencia.
E candidatanan prome cu nan a yega Corsou nan mester a haci dos challenge cu ta conta pa punto. E delegacion tambe ta haya punto pa nan comportacion y disciplina pa yega na tempo e actividadnan, cu ta conta tambe na final. Otro aspecto cu tin influencia y ta hunga un rol ta e parti di social media y obviamente e entrevista cu hurado awe.
Amelia Elskamp su presentacion den trahe nacional a bay super bon y Robin Croes ta contento con e hendenan a aplaudi Aruba y despues a bin patras pa admira su costume. Amelia mes a gosa hopi den su presentacion aunke e tabata kier a baila un cantica di carnaval, pero importante ta cu el a haci un tremendo presentacion dilanti e huradonan y e publico. Segun e wowo critico pa visualisa e posibel ganadora, Robin Croes tin den su top 3: Aruba, Panama y El Salvador. E certamen ta mayan diasabra y por wak esaki live via facebook page di Miss Teen Mundial.
