Anthony Delon, un di e yiunan di e famoso actor Frances Alain Delon cu tin actualmente 87 aña, a acusa den tribunal Hiromi Rollin di 60 aña, cu desde algun aña ta e compañera di su tata di laga e strea di cine henter dia su so, apesar di su evidente falta di autonomia. Anthony hunto cu su otro rumannan Alain-Fabien y Anouchka a denuncia Rollin pa saca probecho di e fragilidad di Alain Delon.
Anthony Delon a bisa cu Rollin tabata laga su tata so den apartamento y cu su ruman Alain-Fabien tabata testigo di un escena den cual Alain tabata su so den cushina sin por lanta. Hiromi Rollin di su parti tambe a demanda e yiunan di Delon acusando nan di violencia den grupo causando un incapacidad di hasta 8 dia, calumnia y robo. Algun tempo pasa den un entrevista cu Le Parisien, Hiromi Rollin a kibra su silencio pa acusa e yiunan di Alain Delon di traha un trampa contra dje cu e meta pa aleh’e for di e actor.
Anthony Delon tambe ta culpa e compañera di nan tata di obstaculisa e relacion cu su yiunan y intimida nan moralmente, y cu nan a haya den un cashi na unda Alain y Hiromi ta biba un total di 100.000 euro, cu el a sconde pa keda cu e placa. Segun prensa Frances, Hiromi Rollin y Alain Delon a conoce otro for di añanan 90, tempo cu e tabata traha como asistente di filmacion di “Le Retour de Casanova”. Pero desde 2019 despues cu e actor a sufri un ataca cerebral cu a disminui su capacidad di mobilidad, e señora aki a pasa pa biba den e mansion di e actor Frances. E propio Alain Delon a presenta Hiromi Rollin durante un entrevista na television dos aña pasa como su ‘compañera Hapones’, mientras cu Hiromi den un entrevista cu Le Parisien, a bisa cu tur siguransa cu e historia di amor entre ambos tin 33 aña.
