E focus di Gabriela Ava semper tabata pa dedica laboralmente na nan empresa familiar Lava Aruba Glass Studio. E ta bibando na Merca pero ta frecuentemente na Aruba pa maneha e area di mercadeo hunto cu su ruman Bruno Ava. Gabriela su prome trabou tabata na Arte Murano Venezuela y su estudionan el a inicia na Instituto de Diseño na Caracas y termina na Miami Art Institute. E momento cu el a termina universidad ya e tabata trahando un tempo caba pa un empresa di arkitectura na Miami te ora el a bin forma parti di Lava Aruba Glass Studio.
Gabriela Ava su pasion como diseñador di interior ta pa desaroya su creatividad plenamente y busca e miho propuesta na e espacionan brindando confort, beyesa y funcionalidad. Un desafio p’e ora di realisa un diseño interior residencial ta por duna forma den e diseño, e esencia di e cliente. Den un hogar e mas importante ta pa tin un diseño cu ta invita bo pa tey y disfruta den trankilidad. Mientras cu un diseño comercial ta pa diseña di un forma mas atractivo pa yega na e publico y invita nan pa drenta.
E estilo den diseño di Gabriela ta contemporaneo y su elementonan ta espacio y color. Un diseño mester tin harmonia, funcionalidad y ekilibrio. Lesa mas di e tendencianan den diseño di interior cu Gabriela Ava ta comparti den Focus Digital Magazine, cu ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
