Rotaract Club of Aruba ta contento y orguyoso di por presenta e di 10 edicion di e evento anual tan gusta cual ta “Pasa Pret cu Rotaract”. Dia 19 di november di 10or mainta pa 2or di atardi, Rotaract Club of Aruba ta organisando e evento aki pa e muchanan. E aña aki e club ta organisa e evento cu e tema “Ban Pariba! y Pasa Pret cu Rotaract” caminda lo tin diferente wega pa mucha. Banda di e weganan aki tambe lo tin stand cu cuminda, bebida, animacion y entretenimento pa tur e chikitinnan.
E evento aki, manera e edicionnan anterior, ta pa celebra dia internacional di derecho di mucha. E muchanan ta nos futuro, proteha y reconoce nan derecho semper ta Rotaract Club of Aruba su prioridad. Pa prome biaha nan ta hibando e evento aki pa districto di San Nicolas, unda nan a scoge YMCA San Nicolas pa tene e evento. Entrada ta completamente GRATIS y na yegada tur mucha lo ricibi un paspoort cual nan lo uza durante e dia. Na cada actividad cu nan participa den dje, lo haya un stempel den nan paspoort.
Rotaract Club of Aruba ta invita henter pueblo di Aruba y ta ansioso pa finalmente celebra e dia tan special aki den grandi y ta spera di wak hopi mucha cu nan mayornan. Un gradicimento special na CMB NV pa kere den e proyecto y ta e sponsor pa haci e evento aki uno exitoso un bes mas.
Rotaract Club of Aruba ta un organisacion pa hobennan entre e edad di 18 cu 35 aña cu ta parti di e famia di Rotary Club of Aruba. Rotaract Club of Aruba a ser estableci na 1991 y desde principio ta organisa varios proyecto na bienestar di nos comunidad.
Pa mas informacion, Like y Follow e pagina di Facebook y Instagram di Rotaract Club of Aruba of subi nan website www.rotaractaruba.com.
