Piso Tres Workcenter a organisa hunto cu un team dinamico un conferencia yama Happy Parents, Happy Children. Un conferencia pa adulto cu enfoke riba nos muchananan y hobennan. E conferencia a tuma luga 14 y 15 di november en conexion cu Dia Internacional di Mucha cu ta dia 20 di november, esta dialuna otro siman.
Despues di un seminario exitoso na Piso Tres na 2022, e organisadornan Queeny Bergen y Zilha Bruin Wever hunto cu co-fundador Laura Tromp y un team dinamico a dicidi di organisa un conferencia cu lo duna e comunidad e oportunidad pa bini hunto pa explora diferente strategia innovativo, conoce e miho practicanan y haya herment y perspectiva valioso riba desaroyo di nos muchanan y hobennan pa asina por lanta un generacion cu muchanan/hobennan mas firme, contento y stabiel.
E conferencia tabata parti den 2 diferente dia, unda cu cada dia tabatin un otro topico, orador y audiencia. E prome anochi, Jermin Bell (psicologo) cu Laura Tromp (Parent Coach) a hiba un combersacion e “Real Talk” unda cu a sa di informa e publico tocante e situacion actual na Aruba a base di estudio y experiencia. Despues e orador internacional Sara Whaley a papia tocante e comportacion di “toddlers” y con pa reconoce diferente comportacion y a comparti strategianan di con por compronde y mehora esaki. E anochi a termina cu Stephanie Pinto, un orador internacional cu a bini for di Australia pa comparti tocante e importancia di tin Inteligencia Emocional.
Diaranson anochi a cuminsa cu James Sneek (Director di 131) cu hunto cu Laura Tromp a hiba un combersacion e “Real Talk” informando e publico tocante e situacion actual na Aruba abase di estudio y experiencia bou di nos hobennan. Sigur e faborito di anochi, Johnny Boekhoudt (psicologo/orador local) a sa di pone e publico hari, yora y sigur ta mas alerta y informa tocante e mente y celebro di un hoben y con importante e rol di mayor, educador y entrenadornan ta basa riba estudio y experencia. Destini Ann Davis, invitado internacional a termina e anochi cu hopi information, practica y hermentnan pa por compronde un hoben y pa tin un comunicacion positivo, con pa por mantene confiansa, atende cu desacuerdo y hopi mas.
Tur dos anochi tabatin un Happy Expo Lounge bon bishita unda cu diferente compania y organisacion a sa di comparti informacion, premio, specials y hopi mas. E organisacion kier a duna tur cu a yuda di un forma of otro y tur cu a atende e conferencia un Danki di Curason! Y pa nos ban sigui yuda lanta un futuro generacion mas resistente y feliz!
