Faltando solamente algun ora pa scoge Miss Universe 2023, e National Director di Miss Aruba Universe, Anoutcka Koolman-Burleson, a combersa brevemente cu Focus y el a bisa cu e ta sumamente agradecido cu Dios pa tur loke e por a logra cu Karol Croes pa pone den luz di mundo. Ta mas cu claro cu su emocionnan ta hopi halto na e momentonan aki, pero Karol a haci su trabou caba y di su parti e tambe a haci su trabou. Nan a uza tur sorto di strategia y contacto cu nan tabata por, pero na final ta keda na e huradonan ken nan ta scoge.
Beyesa ta mas di loke hende ta mira, e ta trata di cosnan cu tin biaha cu bo tin cu lucha pe y Anoutcka ta sumamente contento cu Karol Croes su performance. Pa su presentacion den national costume, el a sinti su mes manera cu el a bise: “Cu ora bo tin bo trahe bisti mi yiu, haci mescos cu ta den parada di Carnaval 70 bo ta cana y den bo shimis e designer di mas caro cu bo ta imagina cu ta bo soño, asina bo ta bay desfila. Dus nos a train just e pasarela online kico lo ta miho pa haci. No worry kico bo tin, no ta e pañanan mester luci pero abo mester sobresali, abo mester carga e paña y no e paña carga bo. Pa e motibo ey mi ta inmensamente feliz cu Karol”.
E diseñador Colombiano, Alfredo Barraza, a crea ambos trahe y door Karol a wordo corona na final di augustus nan no tabatin hopi tempo. Karol mester a train y nan tabatin otro strategianan tambe cu nan kier a logra manera e contactonan internacional y cambionan pa loke nan tin di haci. E tin cu bisa cu pa e motibo ey a just bisa e color y tema na Alfredo Barraza y nan a haya e resultado cu el a duna como designer. Esey ta loke a sosode en realidad y un proceso pa enfoca riba paña nan no a haci. Specialmente paso el a bisa Karol cu importante ta loke e ta bay papia y pa tin e contactonan, door di e corto tempo e mester sa carga su pañanan.
Karol su animo ta sumamente halto, cada cos cu ta pasando e ta bezig ta disfrutando, pero apart di esaki loke Anoutcka a bise ta pa gradici Dios pa cada cos chikito cu nan ta mirando sosodiendo. No lubida cu tanten e di 3 out no cay den e di 9 inning e wega no a caba. Esaki ta loke Anoutcka tabata bisa Karol tur dia pa anime y esaki el a bise awe tambe! Anoutcka su contacto cu Karol tabata 24/7, ki ora cu e tabata por of ora e mester, sea via video call of yamada. No solamente cu Karol e tabatin contacto, pero cu mas persona pa cual nan a crea diferente group chat unda den tur Karol tambe a forma parti pa asina tin transparencia y cu un solo meta: pa nan bin cu e corona
