E plakkaat di reconocemento cu Djurick Marin a ricibi ta un simbolo di aprecio di parti The Ritz-Carlton, Aruba y su coleganan. Esaki ta motiva su persona pa den 2024 e por keda traha riba su cualidad- y habilidadnan como un bon lider. Den e aña cu a pasa Djurick mester a siña con pa ta un bon lider. Durante e periodo aki el a siña wak con e por cumpli cu desaroyo di coleganan, teniendo na cuenta e vision di e compania. Esaki no tur ora tabata un tarea facil.
Pa Djurick Marin loke ta mas importante ta, cu bo mester ta open pa scucha bo coleganan y motiva nan pa logra nan metanan personal. Mesun cos cu su lidernan den pasado a haci, e lo kier haci esaki posibel tambe pa su coleganan pa nan por sigui crece cu e compania. Den e aña nobo aki Djurick Marin kier enfoca mas riba brinda sosten na studiantenan nobo. Den 2023 pa prome biaha e tabata mentor di studiantenan di SPO di cual el a haya e oportunidad di por a guia nan.
Djurick ta haya interesante pa wak con un studiante tur dia ta crece durante su stage y den mesun forma ta haci cada accion/tarea propio. Como mentor e no ta solamente siña algo na un otro persona, pero tambe e ta siña di e generacion nobo. Lesa e interesante entrevista cu Djurick Marin den Focus Digital Magazine di januari, unda e ta comparti cua ta 3 caracteristica cu a yude crece te na e posicion cu e tin actualmente di Chef de Cuisine na The Ritz-Carlton, Aruba.
Download bo revista awo!
