Embassy Suites Aruba a celebra ‘Valentine’s Day’ compartiendo amor entre e miembronan di ekipo como tambe cu nan huespednan. E team di influencer di e hotel a pone un bunita toke di curason na nan vestuario riba e dia tan special aki. Influencers ta un grupo di miembro di ekipo cu ta trainer den nan departamento. Ademas di tin e tarea pa incorpora miembronan di ekipo nobo, nan ta join tambe pa contribui cu evento- y actividadnan.
E grupo di influencers a reparti chuculati pa e huespednan durante desayuno y parti merdia na e piscina. E huespednan a keda hopi contento cu e detaye y atencion. Durante desayuno e influencers a ser pidi na dos ocasion pa canta ‘happy birthday’ y e huespednan a mustra feliz y agradecido pa celebra nan cumpleaño na un manera hopi special na Embassy Suites Aruba. Nan a keda tambe hopi encanta cu e chuculatinan cu tabatin un bunita diseño y por a mira cu e team di pastry a tuma nan tempo pa traha algo dushi y bunita.
Riba Dia di San Valentino no unicamente e huespednan a disfruta di un treat di cos dushi, pero tambe e miembronan di ekipo a ricibi un caha yena di cos dushi manera chuculati y dulce de leche traha cu amor pa e team di pastry. Pa comparti alegria y aprecio riba dia 14 di februari, e miembronan di ekipo a skirbi un tarheta y comparti mensahe di amor, aprecio y amistad. E tarhetanan aki a wordo colga na diferente liña den gang y e miembronan di ekipo a disfruta masha hopi di e actividad aki lesando tur e bunita mensahenan.
