Den un speech conmovedor, e mama real di tres yiu a sinta pa aborda su diagnostico den un video pre-graba na Windsor diarason y lansa diabierna ultimo. El a splica con mientras a pensa cu su condicion no tabata canceroso, e testnan post operatorio a descubri despues cu e tin cancer. Un amigo di e prinses a conta The Sunday Times, cu esaki a pone cu el a papia directamente cu e publico cu den su gran mayoria ta semper cu ne y su famia, y no ta cay den lawaai ni redashi.
Den su mensahe, Prinses Kate a revela cu su diagnostico tabata un shock grandi y hunto cu William nan tabata haciendo tur cos cu ta posibel pa procesa y maneha esaki den forma priva na beneficio di nan famia hoben. El a bisa cu manera por imagina esaki a tuma tempo. El a tuma tempo pa e recupera di un operacion grandi pa por cuminsa cu su tratamento. Pero pa e pareha real a tuma tempo pa splica na nan tres yiunan, George, Charlotte y Louis, di un manera cu ta apropia y sigura cu nan mama lo bay ta okay.
Den un comunicado emiti pa Kensington Palace diasabra, esaki ta bisa cu e Prins y Prinses ta enormemente conmovi pa e mensahenan amabel di e hendenan na Reino Uni, den henter Commonwealth y tur rond mundo como reaccion di e mensahe di Su Alteza Real. Nan ta agradeci pa e apoyo di e publico y pa e comprension di nan solicitud pa privacidad den momento aki.
E ruman di Kate, James Middleton, a comparti un potret di dje y Princess of Wales tempo nan tabata chikito despues di e anuncio di Kate cu el a ser diagnostica cu cancer. Riba su rednan social, e empresario a publica un potret di nan dos mientras nan tabata disfruta di un paseo den naturalesa y el a skibi un mensahe emotivo cu a traves di añanan nan a subi hopi cero hunto y como famia nan lo subi esaki tambe cu ne.
Den e circulo intimo di Kate incluyendo King Charles y Queen Camilla, y su famia, nan a haya sa di e noticia prome cu el a bira publico. Sinembargo segun un informacion nobo for di The Sunday Times, cu Prins Harry y Meghan Markle no a ser informa. Roya Nikkhah, editor real di e corant tabata den contacto cu varias fuente cu a confirma cu no tabatin niun combersacion priva entre e dos rumannan y nan ta kere cu Harry y Meghan, Duke and Duchess of Sussex, a descubri e noticia na mesun tempo cu e publico en general.
