E proceso y transformacion di su yui homber, cu a lanta cu un mama soltera ta locual ta haci Sharleen Tromp mas orguyoso como mama. E sentimento momento cu el a hiba su unico yiu altar tabata uno di amor profundo yena cu hopi goso, alegria y un sentido di ‘fullfillment’. Na inicio di un dia memorabel mientras Sharleen tabata wardando pa drenta e ceremonia cu Shawnn Irving Croes, e no por a contene su emocionnan. Un dia magico, inolvidabel y sigur yena di hopi emocion ta keda graba e fecha 04.04.2024 di e maraviyoso enlace di Shawnn Irving y Karen Torres Jiménez na Forest Campestre na Medellin, Colombia.
E lagrimanan di felicidad a sali di Sharleen su wowonan realisando cu su yiu ta drenta un temporada nobo di su bida. E palabra adecua pa describi con el a prepara su mes pa e enlace matrimonial di su unico yiu ta: “TRANSICION”. Pa Sharleen un transicion mayoria biaha ta sosode durante di diferente fase di un bida di un mama pa cu su yiu, y den e caso aki pa e drenta enlace matrimonial. Ya pa algun tempo Sharleen tabata den e proceso di preparacion pa laga los emocionalmente di su unico yiu pa e por drenta e siguiente fase di su bida cu su casa.
El a educa Shawnn con un hende homber mester prepara su mes pa ta un husband cu ta e provider, e visionario, esun cu ta cuida emocional, mental, fisico y spiritualmente di su casa. Su fundeshi ta e palabra di Dios cu a forma su identidad como persona y su rol como casa. Sharleen ta hopi orguyoso di e madurez di su yiu homber y su deseo ta pa tur Shawnn y Karen nan soño-, vision- y profesianan wordo cumpli.
Den Focus Digital Magazine di mei Sharleen ta conta cu no ta tur ora nan tabata tin’e facil, sinembargo Shawnn semper a sa di ta resiliente y persevera den tur circunstancia. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
