Art Week 2024 su prome proyecto a tuma luga na Cas di Cultura diabierna ultimo. E Art Fashion Model Casting a activa mas di 80 modelo profesional, amateur y aspirante pa participa den e anochi di moda dia 4 di september proximo como parti di e programa di Art Week Aruba 2024.
E aña aki tur cos ta draai rond di e tema “Activa” caminda a pidi varios diseñador local y internacional pa rebeldia, marcha y bringa pa cambio. Ta trata di un total di ocho diseñador for di Colombia, Hulanda y Corsou yegando Aruba danki na apoyo di Mariott Resorts, ademas di nos talentonan Arubiano.
E casting di diabierna ultimo a conta cu varios fashionista cu tabatin e tarea di scoge e modelonan pa luci e creacion di tur diseñador riba e pasarela, cual ta Promenade di San Nicolas. Un danki ta bay na Jeanique de Palm, Roberto Avalo y Ryon Dijkhoff. Organisado ta sumamente contento cu e acogida y con tur cos a bay riba diabierna ultimo.
Participante cu menos experiencia of ningun ta haya entrenamento y practica pa avansa den nan deseo pa bira profesional. Atrobe Art Fashion, mescos cu henter e Aruba Art Fair ta fungi como plataforma pa talento local y nobo profila. Asina sa pasa cu modelo cu pa prome biaha ta desfila den Art Fashion despues ta haya otro oportunidad tanto na Aruba como den exterior.
Aruba Art Week ta un siman di arte, cultura y movecion entre 2 pa 8 di september y ta inclui ademas di Art Fashion, tambe e eventonan di Art Table y Art Fair. Pa mas informacion y pa cumpra ticket cu ta inclui un regalo di L’Oreal, por acudi na e website artweekaruba.com. Sigura bo presencia na e tremendo show cu e aña’ki ta dirigi pa Tracey Nicolaas.
Art Week Aruba ta un produccion di ArtisA cu cooperacion di Aruba Tourism Authority, Prins Bernhard CultuurFonds, La Cabana, Unoca y Elite Productions.
