Desde chikito semper Darwin Torres a wordo atrai na cuminda, su proceso y e forma cu e ta wordo ehecuta te yega na e producto final. Su wela y mama definitivamente tabata un fuente di gran inspiracion den su bida. Su maestranan, cokinan grandi y un gran aporte di conocemento pa su inicio. Despues el a converti den un hobby durante su etapa universitario te na e momento cu el a sinti cu esaki ta loke e kier haci den su bida. El a bay un scol di gastronomia y su pasion pa ser parti di e bunita arte aki, a haci cu actualmente Darwin Torres ta un Chef renombra.
Chef Torres tin en total 34 aña dedica na e bunita disciplina aki. Durante su trayecto el a traha na diferente cadena di hotel den Caribe manera na Puerto Rico, Sint Maarten, Saint Croix y Aruba. E chefnan profesional cu el a traha cu nan a aporta gran conocemento na su carera como chef. Darwin a participa tambe na workshops cu maestronan grandi manera Ferran Adria, Andoni Aduriz, Edgar Leal y Leonor Espinoza pa menciona algun di nan.
Loke ta pasiona Darwin Torres pa ser un chef ta cu e ta permiti’e crea y combina ingredientenan pa logra sabor- y texturanan nobo, esaki p’e ta magia y arte. Tin e placer cu e hendenan ta disfrutando di un bon cuminda ta un reto cu e ta pasiona cu ne, ta p’esey e ta dedica e tempo necesario pa logra excelente resultado cu hopi responsabilidad y pasion. E ta un orguyo enorme pa Chef Torres ora un huesped duna compliment pa e cuminda. Esaki p’e ta rekeri mas responsabilidad y dedicacion.
Chef Torres ta Regional Executive Chef na Divi Corp y ta enfatisa riba loke ta Fresco y di Calidad Halto, esaki ta basicamente su filosofia culinario. Aplica su habilidad- y tecnicanan corecto den cada elaboracion pa evita daña e ingrediente. Tur e factornan aki ta draai rond di simpleza y uzo di ingredientenan fresco y di calidad halto. E ta defende e idea cu uzando ingredientenan simpel y fresco ta permiti cu e sabornan natural ta briya, loke a haci su recetanan asina popular entre e hendenan pasiona cu gastronomia.
Den Focus Digital Magazine di november, Chef Darwin Torres ta elabora riba otro aspectonan hopi importante manera con pa maneha e cumindanan segun e principionan basico di siguridad alimenticio. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
