MARISOL TROMP A ESTABLECE SU MES COMO UN BOS CONFIABEL

Marisol Juliette Tromp a nace dia 28 di september 1969 na Aruba. Marisol ta un lider politico dedica y un mama di dos yiu muhe, kende su carera politico a keda marca pa su compromiso di sirbi su pueblo y pa progreso social. Marisol por papia diferente idioma; Papiamento, Hulandes, Ingles, Spaño y Frances. Marisol ta conoci pa su envolvimento activo den asuntonan cu ta regarda bienestar social, preservacion di medio ambiente, infrastructura, educacion, empodera hende muher y derecho di mucha.

Educacion y Carera Profesional

Marisol a inicia su estudio na scol basico Colegio Bon Bini na Madiki y a sigui pa Colegio Arubano, unda el a termina su V.W.O. (pre-universitario) na 1988. Despues Marisol a sigui su estudio avansa academico na Universidad di Radboud na Njjmegen, Hulanda (anteriormente Universidad Catolico na Nijmegen), caminda el a inicia cu e estudio di Psicologia y despues a haci Pedagogische Wetenschappen caminda el a obtene su Master of Arts den Pedagogia di Famia na 1995.

Ora el a regresa su pais natal Aruba, Marisol a cuminsa su carera profesional na e Departamento pa Asuntonan Social, caminda el a traha di 1995-1997 dunando sosten na famianan y hobennan cu tabata enfrenta dificultadnan den bida y relacion.

Carera Politico y Logronan

Na aña 1997 Marisol a participa pa prome vez na eleccion y drenta arena politico como Miembro di Parlamento, y asina a inicia un carera publico pa decadanan. Conoci pa su experticio y dedicacion, el a wordo nombra como Ministro di Infrastructura y Asunto Social na 2001, sirbiendo tambe como Vice-Premier di Aruba for di 2001 te 2002. Su influencia a crece na momento cu el a wordo renombra den varios posicion ministerial, sirbiendo como Ministro di Infrastructura, Asunto Social, y Educacion desde 2005 te 2009, mientras cu e tabata ta tambe Vice-Premier.

Marisol a sigui despues cu su trabou legislativo den Parlamento di Aruba, unda el a pusha diferente causanan social. Entre 2013-2016, el a ehecuta e funcion di Presidente di Parlamento di Aruba y entre 2017 pa 2020 el a fungi tambe como Lider di Fraccion. Na 2020, el a bolbe den e ramo ehecutivo como Ministro, Marisol a bolbe ocupa e funcion ehecutivo como Ministro di Planificacion Territorial, Infrastructura y Medio Ambiente te na october 2020. Durante su carrera politico, Marisol ta conoci pa su caracter fuerte y determina, sirbiendo dos biaha como Miembro Independiente den Parlamento di Aruba (2011-2013, 2016-2017).

Liderazgo den Parlamento y Iniciativanan Legal

Un figura prominente den Parlamento di Aruba, Marisol a ocupa rolnan clave den comisionnan central y permanente, incluyendo e funcion di Presidente di Comision Central pa Asunto Social, Famia, Cuido pa Adulto Mayor y Salud Publico. El a contribuí den varios otro comision parlamentario cu responsabilidad riba tereno di educacion, finansa, infrastructura, ciencia y sostenibilidad. Entre 2013-2016, el a guia e Comision Special pa Independisa Parlamento di Aruba, supervisando amiendanan constitucional y e establecimento di un Ombudsman.

Algun di su logronan legislativo ta inclui funda e Parlamento Hubenil di Aruba y implementa e Plan Strategico Nacional di Educacion (NOP/The Learner 2007-2017), ambos cu ta refleha su dedicacion na educacion y empodera hobennan. E tabata tambe instrumental den traha e Ley di Ruimtelijke Ordeningplan (ROP), subrayando su compromiso pa desaroyo sostenibel. Marisol tabata y ta tambe un participante activo den IPKO (Consulta Inter-Parlamentario di Reino) y CKABB (Comision di Asuntonan di Reino y Relacionnan Exterior), promoviendo interesnan Arubano dentro di Reino Hulandes.

Compromiso Mas Aya di Politica

Banda di su rolnan oficial, Marisol a dedica su mes na causanan social y ambiental. Di 20162019, e tabatin e funcion di Vice-Presidente di directiva di Preserva Malmok, un organisacion cu e enfoke ta riba esfuersonan pa preserva nos medio ambiente.

For di 2012 te cu awendia, Marisol ta produci y ta host di Voices & Choices, un programa di conscientisacion via television cu ta brinda un plataforma pa discuti y intercambia riba temanan importante den sociedad.

Liderazgo Fuerte: atrabes di e Confianza y Sosten di Votadornan desde 1997 te 2021 Durante su carera profesional y politico, Marisol Juliette Tromp a sa di gana e confiansa di pueblo Arubano constantemente, demostrando un liderazgo fuerte y resiliente riba varios plataforma político. Su trayectoria politico ta refleha tanto su entrega di servicio publico como su capacidad pa adapta riba e plataforma politico.

• Na 1997 Marisol a cuminsa su carera politico sacando su mes cu votonan preferencial, y a bira miembro di Parlamento cu un base solido di 1,538 voto individual.

Na 2001 el a alcanza 4,708 voto individual na 2001 y 4,392 voto individual na 2005.

Pa 2009, el a mantene un apoyo fuerte obteniendo 2,880 voto individual, indicando su relacion consistente cu su comunidad y compomiso cu MEP.

Entre 2011 y 2013 e tabata un parlamentario independiente den Parlamento.

• Den 2013, su transicion pa AVP a culmina logrando e respet di votadornan unda cu el a saca su mes cu votonan preferencial (voorkeursstemmen) y el a haya 1,643 voto individual riba nr 29 riba e lista berde, pruebando cu e por y a inspira confiansa mas aya di limitacionnan partidario tradicional.

Legado Su carera profesional y politico caracterisa pa su servicio publico, compasion y su dedicacion consistente pa su pueblo, Marisol Juliette Tromp ta sigui boga pa cambio progresivo. Su trabou a laga un impacto duradero riba e sociedad Arubano, influenciando tumamento di decision riba nivel di enseñanza, infrastructura, bienestar social y medio ambiente. Pa medio di su liderazgo, Marisol a establece su mes como un bos confiabel na Aruba, saliendo na vanguardia di e generacion actual y di futuro.