Merviné ta sinti sublime, saludabel, contento, fuerte y mas feliz cu nunca. For dia cu el a baha cu pensioen, el a cambia su estilo di come y di bisti completamente. Prome cos cu Merviné a haci ta corta tur su carsonnan largo y converti nan den short. E motibo pakico e no ta bisti mucho paña ta paso como bodybuilder e ta train pa tin un bunita curpa pa show. E ta pone accento riba e paña pa saca su body. Su lema ta cu e ta bisti e paña y no ta e paña ta bisti Merviné Kock.
Semper Merviné a sport practicando ehercicio, hunga softball y baile. Durante su epoca di gimnasta el a sali malo den un salto y el a cay riba su nek/lomba. Ora el a bay studia na Hulanda e dolor tabata molesti’e hopi y e fysio a mand’e bay un gym pa haci su musculonan di su lomba y nek fuerte. Esey ta na 1984 y desde e tempo ey Merviné a keda bay gym te awe y no a stop nunca. Training cu peso a dun’e confiansa, hisa su autoestima y durante su studio el a drecha su focus y structura su bida. Merviné a caba dos HBO opleiding den 4 aña y caba su estudio na Universidad di Leiden den 20 luna.
Desde 1984 Merviné ta train y el a participa na un competencia na 1985 na Hulanda, sinembargo door di su estudio el a stop di competi. Competencia ta costoso y su estudio y trabou a exigi hopi tempo. For di 2018 cu el a baha cu pensioen, el a coy e drive back y den 2 pa 3 aña el a yega na e curpa bek di 1985 – muscle memory – pero awor e tin mas masa muscular. Aunke pa tin e body actual, e proceso no tabata facil. E bentaha cu e tabatin ta cu nunca el a subi hopi peso. Ademas edad ta hunga un rol grandi door cu su curpa, esta e musculonan no ta recupera mes lihe cu 20 aña pasa.
Su mayor sacrificio pa keda mantene den condicion ta pa cambia su MIND SET: “Mi kier e curpa cu mi ta soña cu ne… kiermen sacrificio! Come na ora y come loke mi curpa mester y na midi no matter what: cuminda ta wordo pisa, drumi na ora y tuma off days di gym. E tuma dianan liber tabata mas dificil. Pakico? Mi ta haci’e cu pasion y ta pone mi sinti bon y feliz. Ora mi ta den gym mi ta focus y mi no kier pa ningun hende stroba mi. Tur dia mi ta come entre 7or di mainta y mi ultimo cuminda ta 6.30 di atardi. Door di disciplina y autodeterminacion pa logra un bunita curpa cu mi tabata soña cu ne, mi a logra… pero ainda falta”.
FOCUS ta inicia 2025 cu un hende muhe cu ta inspira y ta afirma cu e edad no ta bis’e nada! “Jammer cu den comunidad nan ta label cu ora bo tin tal edad bo mester actua na e edad ey – BIG NO – “… Lesa mas kico tur Merviné Kock ta comparti di su estilo di bida den Focus Digital Magazine di januari, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
Download bo revista awo!
