Resolucion di un Aña Nobo ta obhetivonan cu un persona ta propone pa concretisa durante e diesdos lunanan cu a caba di inicia. E ta un momento pa reflexiona riba e cumplimento di un ciclo, pero mas importante ta pa enfoca riba inicio di un otro. Tarrick Ras, Mayo Stoppels, Mitch Almary y Milouska Solognier, cuater persona cu ta destaca cu nan trabou, talento y luz propio den e funcion cu nan ta eherciendo ta comparti den Focus Digital Magazine di januari, cua ta nan 3 cualidad pa logra nan metanan cu exito den 2025. Ademas ta conta di nan desafio di mas grandi aña pasa y kico ta algo cu nan lo kier experiencia den 2025.
NOMBER: TARRICK RAS
FUNCION: RADIO HOST & MC
Segun Tarrick su tres cualidadnan mas importante ta:
Pasenshi – Disciplina – Consistencia. Di pasenshi e ta bisa: “Pa confia den e proceso hasta ora e resultado no ta inmediatamente. No compara bo mes cu otro, cu trabou duro bo lo logra. Remember: “Rome wasn’t built in a day.” Pa Tarrick disciplina ta: “presenta hasta riba e dianan cu bo no tin gana.” Consistencia e ta considera como un di e yabinan di mas importante pa exito!
NOMBER: MAYO STOPPELS
FUNCION: FOTOGRAFO & INFLUENCER
Pa Mayo Stoppels e les of desafio mas grandi durante 2024: “Un di mi mayor desafionan tabata pa mantene mi inspira den un mundo asina acelera y competitivo, enfrentando retonan di tur indole tanto personal como laboral. Sinembargo, cada obstaculo a yuda mi crece pa ser mas creativo y balora aun mas resiliencia como parti de mi proceso artistico”.
NOMBER: MITCH ALMARY
FUNCION: ARTISTA Y MARKETER
Pa aña 2025, Mitch Almary kier focus mas pa crece den su trabou, sigui siña y expande su network den e mundo di mercadeo y corporativo. Riba tereno artistico e lo kier sigui subi escenarionan nobo cu publico mas grandi. Su 3 cualidad cu lo yud’e logra su metanan: ”Perseverancia, keda semper humilde y sigui kere den mi mes”.
NOMBER: MILOUSKA SOLOGNIER
FUNCION: PR & Corporate Communications Specialist
Aruba Tourism Authority
E desafio di mas grandi di 2024 pa Milouska Solognier tabata pa siña compronde e pasado y e generacionan anterior, y laga esaki los. Algo cu a provee un sentimento di libertad interno. Pa aña 2025 e focus di Milouska: “Trankilidad continuo den mi circulo personal”.
Den e revista di e luna aki por lesa mas di locual Tarrick, Mayo, Mitch y Milouska ta comparti, cu sin duda ta un inspiracion pa logra nos metanan pa 2025. Focus Digital Magazine ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
Download bo revista awo!
