Janine “Jay” Ch. Dijkhoff de Windt for di chikito a mustra su talento cantando den e veranda di cas di su mayornan na Corsou. El a desaroya for di hopi jong un conexion profundo cu musica, siñando toca guitara, scuchando cuerde y zonido. El a perfecciona su propio habilidadnan pa canto, creando cancionnan y haciendo nan di dje. Cu su 13 aña di edad e tabata toca guitara den misa y canta pa prome biaha dilanti un publico grandi. E momento ey a marca e inicio di su biahe musical, aunke e no tabatin niun idea unda esaki lo hib’e den futuro.
Mientras e tabata creciendo, el a envolve su mes completamente den musica di añanan 60, 70 y 80, cual a hunga un rol significante den su gusto y estilo. Musica tabata semper e curason di su cas, un presencia constante den su bida diario y eventonan como tambe su hobby. Cualkier persona cu conoce Jay por testigua su pasion, con e ta pasa su dianan cantando y scuchando musica. Hopi biaha e ta bisa: ”Nos por semper mehora den cantamento” y tabata continua siñando y creciendo como artista.
Paralelo cu su carera musical, el a logra un degree den Business Management. El a sigui conseho di su tata pa e tin su ‘papelnan’ den su man, pero nunca a tambalea den su amor pa canto. Awendia el a construi un carera musical di 36 aña cantando y presentando, cual ta su refugio, bida, rosea y ser completo. Jay a casa na november 2021 y el a bin biba na Aruba, cu el a scoge pa bira su cas. Como mucha e tabata bin di bishita na Aruba kedando cerca su bisawelo, cual cas ta Museo Archeologico di Aruba awendia. Jay su famia a inculca den dje pa ta sumamente orguyoso di tin sanger Arubiano den su benanan.
Janine “Jay” Ch. Dijkhoff de Windt ta den Focus Digital Magazine di april contando detayenan interesante di e diferencia bibando na Aruba compara cu Corsou. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Download bo revista awo!
