E berdadero inspiracion pa Giancarla Lize-Mariel Lobbrecht tuma e rol di Presidente di WOW Aruba ta e deseo personal pa supera su mes. E plataforma aki ta un oportunidad pa e sali for di su zona confortabel y denta den e stretch zone, e espacio unda crecemento ta tuma luga. Giancarla ta inspira pa e reto di haci su mes incomodo den un manera constructivo. E vision di WOW ta enfoca riba un sociedad, unda hende muhe ta yuda otro, ta comparti liderazgo y ta crea cambio duradero. Sigur algo cu ta resona profundamente cu Giancarla, aparte di e mision y vision di WOW Aruba.
Giancarla su trayecto cu WOW Aruba a cuminsa na 2021 como un non-member, durante e periodo ey el a asisti na varios reunion mensual. Ainda non-member na 2022 el a forma parti di e team di conferencia “Becoming Braver You” un experiencia inolvidabel cu hopi enseñansa, specialmente e trabou den team y e dinamismo entre e damanan. E aña ey, Giancarla a bira un miembro oficial di WOW y el a forma parti di dos comite. Na 2023 el a forma parti di Board y na 2024 a tuma e rol di Vice-Presidente di e board y finalmente na 2025 el a bira Presidente di e organisacion.
Giancarla Lobbrecht a gradua cu un Masters den Administracion Publico cu specialisacion den Organisacion, Maneho y Gobernacion Publico na Erasmus University Rotterdam. Durante su estudio, el a siña diferente principio di liderazgo manera traha maneho strategico di entre otro, institucion publico y organisacionnan non-profit. Y awor den su rol como Presidente di WOW e por uza e conocemento aki pa yuda nan organisacion crece y desaroya. Actualmente Giancarla ta traha den area huridico den sector publico y e mester bisa cu esaki a aporta gran parti na su crecemento personal y profesional.
Den Focus Digital Magazine di e luna aki Giancarla Lobbrecht como e presidente di WOW Aruba ta splica kico empoderamento ta nifica p’e den su esencia y tambe ta comparti su consehonan na e hende muhenan jong cu ta aspira pa lidera den nan comunidad. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
