E inspiracion di Guizza Maria Steenvoorde pa participa den certamen di beyesa tabata pa representa Aruba cu orguyo, pero tambe pa mustra cu un hoben por logra hopi mas cu loke e mundo ta spera. El a mira e certamen manera un plataforma pa conta su storia, pa defende neurodiversidad y pa inspira otro hoben cu ta sinti cu nan “no ta fit” den e patronchi di sociedad. Guizza ta kere den esey y su inspiracion a sigui crece cu cada paso riba su caminda.
Na 2024 Guizza a wordo corona como Teen Universe Aruba y su siguiente gran logro tabata e titulo maximo di Teen Universe International 2025. E momento cu a anuncia Aruba como e ganadora, e no lo lubida nunca mas. Guizza tabatin e cantica di Michael Lampe den su cabes “Soño Arubiano” desde top 16 te cu ora el a tende “Aruba”. Su curason a para un seconde. El a pensa riba su famia, su isla y tur e hobennan cu a mir’e riba pantaya. El a sinti un mescla di gratitud, orguyo y un sentimento profundo cu “WOW… nos por!”. El a sinti cu su spirito a bula riba e escenario.
Den e concurso di Teen Universe International, el a dicidi di conta mundo su berdad uzando e plataforma pa trece luz riba Neurodiversidad. Guizza a confronta un aña di mira su mes cara-a-cara y finalmente compronde kico a pasa den su cabes y su curason tur e tempo. Ora Dr. S. Ebecilio di Sosten, un neuropsycholoog, a diagnostica Guizza cu Autism Spectrum level 1, ADHD tipo 1, un forma di faalangst, perceptuele dyslexia y dyscalculie… el a sinti un mescla di alivio, miedo, claridad y un paz cu e no a spera. El a compronde cu nada tabata su falta… e tabata simplemente wired diferente y e diferencia ey tin su beyeza propio.
Ki impacto e logro tabatin riba bo como un hoben?
E logro aki a duna mi un sentido nobo di responsabilidad. Mi a compronde cu mi bos tin peso y cu mi historia por habri porta pa otro. El a haci mi mas consciente di mi rol como modelo pa e generacion nobo y mas firme den mi deseo pa defende inclusion y respet. Tambe mi a haya e oportunidad como Teen Universe International pa bishita diferente certamen di Teen Universe. Mi a bay Teen Universe Spain y Teen Universe Panama caminda mi a forma parti di e panel di hurado. Na Spaña mi a duna e candidatanan les di pasarela y oratorio. E organisacion di Teen Universe Spain a invita mi bay Fashion Week New York, Milan y Paris.
Ki lesnan bo a siña cu bo lo hiba den e Aña Nobo?
Mi a siña cu humildad ta e clave, disciplina ta e brug y autenticidad ta e poder. Cu bo mes por logra loke bo ta pone bo alma aden, pero bo mester keda real cu bo mes den tur paso. Den e Aña Nobo mi lo hiba cu mi e balentia pa sigui papia riba e temanan cu ta importante y pa siña di cada obstaculo.
Ki habilidad of hobby nobo bo kier siña den 2026?
Den 2026 mi kier siña mas di filmmaking y storytelling, pa mi por crea contenido cu ta duna bos na e hobennan riba un manera creativo. Mi kier siña tambe mas di public speaking pa mi por representa Aruba ainda mas fuerte internacionalmente. Mi kier concentra riba mi estudio y forma un carera.
Bo deseo pa 2026?
Mi deseo pa 2026 ta claridad, crecemento y union. Mi kier continua representa Aruba cu dignidad, inspira otro hoben pa kere den nan mes y sigui lucha pa un mundo mas bondadoso cu mas comprension pa tur diferente manera di pensa y ser. Y sinceramente mi deseo mas grandi ta: paz den mi y paz entre nos.
