E inspiracion di Tara van der Werk pa participa den certamen di beyesa a surgi principalmente di su deseo pa representa su pais y pa crece como persona. E ta kere semper den e poder di disciplina, autoestima y liderazgo. E certamennan di beyesa ta un plataforma cu por habri hopi porta pa desaroya e cualidadnan aki. E pasion tambe di Tara pa yuda e animalnan cu no tin hogar, a motiv’e door cu pa medio di e plataforma aki e por uza su bos pa bringa pa derecho di e animalnan.
Michael Salazar
E prome biaha cu Tara a competi den un eleccion tabata na Scol Basico Kudawecha unda el a keda eligi como e Reina di Carnaval di e scol. El a participa den algun certamen local y internacional, incluyendo Miss Teen Aruba International y despues Miss Teen Nuestra Belleza Internacional. E momento cu a menciona Aruba como Miss Teen Nuestra Belleza Internacional 2025 tabata un momento inolvidabel y hopi emocionante. Pa Tara e tabata un combinacion di alegria, orguyo y lagrima. El a sinti hopi agradecido pa su famia, su ekipo y tur hende cu a kere den dje.
Angelo Trimon
Con e logro aki a impacta bo como hoben?
E titulo aki a habri mi wowo pa e potencial grandi cu nos hoben tin si nos kere den nos mes. Mi a bira mas fuerte, mas disciplina y mas compromete pa sigui lucha pa mi soñonan. El a duna mi fe cu nada ta imposibel.
Ki lesnan bo a siña cu bo lo hiba den e Aña Nobo?
Mi a siña importancia di perseverancia y trabou di team. Tambe cu crecemento personal ta bini ora bo sali for di bo zona confortabel. E lesnan ey, mi lo sigui uza pa logra hopi mas meta grandi. Por ultimo mi a siña cu disciplina, motivacion y perseverancia ta e ingredientenan principal pa logra cualkier meta cu bo pone den bo bida.
Ki habilidad of hobby nobo bo kier siña den 2026?
Pa mi concurso di Nuestra Belleza Internacional mi mester a haci un talent show pa cu esaki mi a subi riba mi spits di ballet despues di 5 aña. Esaki a duna mi e gana di sigui sondea e oportunidad pa continua cu e hobby aki.
Bo deseo pa 2026?
Mi deseo ta pa sigui lucha pa nos animalnan y tambe mi ta spera pa un aña yen di exito, paz, amor y bendicion pa tur hende.
Edad: 17
Scol: Graduado e aña aki di Colegio Arubano
Lo bay Hulanda pa studia strafrecht na 2026
Hobby: Baila y Kitesurf
