AEROLÍNEAS ARGENTINAS TA LANSA SERVICIO DIRECTO NOBO ENTRE ARGENTINA Y ARUBA

Despues di hopi aña di ta identifica como un di e mercadonan prioritario pa servicio directo, sosteni pa e demanda constante creciente, Aruba a marca un momento historico riba 1 di januari 2026. Aruba a dal un stap grandi pa dilanti den su strategia di conectividad aereo Latino Americano cu e lansamento di e servicio directo nobo di Aerolíneas Argentinas entre Argentina y Aruba.

E vuelo inaugural a sali for di Aeropuerto Internacional Ezeiza (EZE) cu tur 170 asiento completamente ocupa, reflehando e demanda fuerte di mercado y un contesta sumamente positivo di parti di e biaheronan Argentino.

Pa celebra formalmente e momento, tabatin un ceremonia inaugural cu a tuma luga riba dia 8 di januari, na Aeropuerto di Aruba, treciendo hunto e stakeholdernan clave di gobierno, aviacion y turismo. E evento a conta cu remarkenan oficial di Minister di Turismo, Transporte y Labor, mr. Wendrick Cicilia, como tambe discurso di Ronella Croes, CEO di Aruba Tourism Authority (A.T.A.) y Jo-Anne Arends, Aviation Business Development Executive na Aruba Airport Authority. E celebracion a conclui cu un ceremonia tradicional di cortamento di cinta y cortamento di bolo, oficialmente yamando bonbini na Aerolíneas Argentinas na Aruba.

Originalmente anuncia como un ruta cu lo opera pa dos luna, e rendimento fuerte trempan di e ruta a pone cu Aerolíneas Argentinas a extende e servicio te cu fin di september 2026, manteniendo vuelonan regular for di Buenos Aires y Córdoba. Esaki ta representa un lansamento sumamente unico, cu e compania di aviacion ta introduci e servicio nobo simultaneamente for di tres aeropuerto.

E compania di aviacion ta opera e ruta cinco biaha pa siman uzando un Boeing 737 MAX 8 (170 asiento), ofreciendo mas cu 7.000 asiento den 43 vuelo durante e temporada inicial. E servicio ta representa un paso strategico pa fortalece presencia di Aruba den Latino America y diversifica su red di ruta mas leu cu Norte America.

Structura di ruta (januari – februari 2026)

• Buenos Aires (EZE) – tres vuelo sin stop semanal pa Aruba, regresando via Córdoba (COR)
• Buenos Aires (AEP) via Córdoba (COR) – un buelo seminal
• Buenos Aires (AEP) via Mendoza (MDZ) – un buelo semanal

E orario di vuelo ta diseña pa coincidi cu e periodo di vakantie di zomer di Argentina, permitiendo e biaheronan cuminsa disfruta for di e momento cu nan yega. For di Ezeiza, vuelonan di anochi ta sali 23:55, yegando Aruba pa 07:00, cu vuelonan di regreso saliendo di Aruba pa 08:30 y yegando Buenos Aires pa 18:45, sigui pa un estadia cortico na Córdoba.

Ademas e biaheronan Argentino ta entre e huespednan di balor di mas halto na Aruba. E duracion promedio di estadia a aumenta cu 147% aña tras di aña, yegando 8.4 anochi YTD november 2025, haciendo Argentina e di dos mercado Sur Americano mas halto pa duracion di estadia.

“Conecta cu Argentina ta alinea cu nos strategia pa fortalece e lasonan dentro di e region di Latino America, habriendo oportunidadnan nobo pa crecemento, asociacionnan y desaroyo di mercado a largo plaso”, asina Jo-Anne Arends, Aviation Business Development Executive na Aruba Airport a expresa. Arends a continua bisando cu: “E exito inmediato di e ruta aki y su extension mas leu di e temporada inicial ta confirma e importancia di Argentina como un mercado strategico pa Aruba.”

“E popularidad di Aruba ta crece na Argentina, danki na nos esfuersonan efectivo di promocion y posicionamiento. E trabou strategico aki a lanta un curiosidad y demanda inmenso pa experencia e bunitesa di Aruba y nos cultura di ‘Masha danki’. Nos ta entusiasma pa anuncia cu nos soño a bira un realidad cu e lansamento di e vuelonan directo entre Argentina y Aruba”, asina Ronella Croes, CEO di Aruba Tourism Authority a bisa. Croes a continua bisando cu: “Mirando pa 2026 nos lo sigui promove e ruta nobo aki strategicamente den varios region di Argentina como parti di nos strategia di diversificacion, cu e meta pa fortalece e posicion di ‘One Happy Island’ mas ainda.”

“E conexion directo aki cu Argentina ta fortifica e posicion di Aruba den Latino America y ta representa un paso significativo den direccion di un futuro turistico mas diversifica y resiliente”, asina Wendrick Cicilia, Minister di Turismo, Transporte y Labor a enfatisa.

Schedule di vuelo

Buenos Aires (EZE) – Aruba (AUA)

Route	Days of Operation	Departure	Arrival
EZE → AUA	Mon – Sat – Sun	EZE: 23:55	AUA: 07:00
AUA → COR	Mon – Tue – Sun	AUA: 8:30	COR: 16:55
COR → EZE	Mon – Tue – Sun	COR: 17:25	EZE: 18:45

Buenos Aires (AEP) – Cordoba (COR) – Aruba (AUA)

Route	Days of Operation	Departure	Arrival
AEP → COR	Thu	AEP: 11:45	COR: 13:15
COR → AUA	Thu	COR: 14:30	AUA: 20:40
AUA v COR	Thu	AUA: 22:15	COR: 06:40
COR → AEP	Thu	COR: 08:10	AEP: 01:20

Buenos Aires (AEP) – Mendoza (MDZ) – Aruba (AUA)

Route	Days of Operation	Departure	Arrival
AEP → MDZ	Fri	AEP: 09:45	MDZ: 11:45
MDZ → AUA	Fri	MDZ: 13:00	AUA: 19:35
AUA → MDZ	Fri	AUA: 22:30	MDZ: 07:20
MDZ → AEP	Fri	MDZ: 08:50	AEP: 10:30

Ticket y reservacion

Ticket ta disponibel riba aerolineas.com.ar y agencianan di biahe autorisa.

Tocante Aerolíneas Argentinas

Aerolíneas Argentinas ta e compania di aviacion insignia di Argentina y un di e companianan di aviacion lider di Latino America cu ta ofrece un red amplio di vuelonan domestico y internacional. Cu un flota moderno cu ta inclui e Boeing 737 MAX 8, e compania di aviacion ta conecta e pasaheronan na ciudadnan grandi den Sur America, Noord Amerika y Europa, brindando experiencianan di biahe cu ta sigur, confiabel y beneficioso. Conoci pa su compromiso cu servicio di calidad, Aerolíneas Argentinas ta hunga un rol clave den promove turismo y conexion empresarial, na mes momento ta impulsa e vinculonan economico y cultural di Argentina cu exterior.