E prioridadnan principal di mr. Gerlien Luzdiane Croes, como Vice Premier y Minister di Relacionnan den Reino, Educacion, Hubentud, Innovacion y Deporte ta pa inverti den nos futuro generacionnan, den e formacion di nos ciudadanonan, e capital humano di nos pais. Garantisa cu e structuranan necesario tey y/of ta wordo crea pa por duna oportunidadnan basa riba equidad pa nos hendenan, cu nan por sigui crece continuamente pa hunto nos por yuda carga nos pais. Minister Croes ta e lider femenino mas hoben den politica na Aruba y den e prome salida cu su partido FUTURO nan a logra 3 asiento.
E lesnan di liderazgo cu Gerlien a siña desde cu el a drenta Gabinete AVP-FUTURO ta pa busca perspectivanan y analisa scenarionan di un forma agil. Esaki ta nifica kere den nos mesun hendenan y nan capacidad pa hunto por yega na decisionnan responsabel. E ta tuma decisionnan semper y cuando teniendo na cuenta nos leynan y manehonan vigente. Lesnan di liderazgo cu Gerlien ta hiba cu ne diariamente ta tuma y duna e espacio necesario pa hunto nos pais por crece di un forma colectivo. Alabes tuma decisionnan facil of dificil y cu rapidez dependiendo di e scenarionan tambe ta lesnan y habilidadnan cu mas y mas e ta desaroya den e funcion aki como Minister.
Pa Minister Croes perseverancia den su bida diario y no solamente politica ta nifica e consistencia di ken e ta y con semper e ta purba hiba e lucha pa bay dilanti y crece, no obstante cualkier obstaculo cu bida pone su dilanti. E ta e fe den kere kico humanamente e por y tambe e fe den busca e forsa y sabiduria caminda ainda e mester crece. Perseverancia pa Gerlien Luzdiane no ta solamente e proceso ora cu e ta logra su metanan, pero tambe e lesnan cu e ta topa durante e proceso aki, momentonan cualkier sea e circunstancia, caminda cu e mester a lanta para bek pa asina sigui brinda e miho di su mes na su yiunan, su mes, famia y comunidad.
Den Focus Digital Magazine di januari, Gerlien Croes ta conta cua ta e reto personal cu el a supera den 2025 y kico el a siña for di esaki. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
