Nos ta den di prome trimester di 2026 y ta sinti manera cu nos ta den un comienso nobo. Nos a traha entre otro plannan nobo y sigui nos soñonan. Entre tur esakinan hopi biaha nos ta lubida un di e cosnan mas fundamental: Paz Financiero. E 3 tip aki ta yuda bo haya confiansa, motivacion y bista general pa 2026.
1. Traha cu metanan chikito pa un motivacion maximo
Hopi hende ta cuminsa aña cu metanan grandi: un suma di spaar grandi, paga debenan of porfin por logra tin un grip riba nan gastonan. E metanan grandi por laga nos sinti agota pa cual e motivacion hopi lihe por caba. P’esey ta importante pa cuminsa cu metanan chikito y concreto cu bo por caba den 30 dia cu ne. Por ehempel: spaar 50 florin of skirbi diariamente bo gastonan. Bo lo ripara cu e efecto ta mas grandi di locual bo ta kere. Pa motibo di e exitonan chikito aki, bo ta haya mas confiansa. Bo ta wak con bo ta cana stapnan pa bay dilanti y kere mi cu e sentimento ey ta adictivo. E metanan chikito aki ta “set the tone” pa asina bo cuminsa cu e metanan mas grandi durante di aña.
2. Skirbi tur loke ta bo entrada y bo gastonan (debenan)
Bo por maneha bo placa na e momento cu bo sa unda bo ta para. Asina mes tin bastante persona cu no tin idea cuanto nan ta gana/ricibi na placa di luna y ni tampoco ta consciente di cuanto ta nan gasto/debenan. Percura pa e aña aki tin un presupuesto simpel. Nada dificil. Uza lo basico. Skirbi loke bo ta genera na entrada y locual ta bo gasto/debenan. Door di haci esaki, bo lo realisa tambe e patronchi/custumber con bo ta atende cu placa. Bo lo ripara cu kisas bo ta gasta mas placa na compras cu bo ta pensa. Of bo lo realisa cu bo ta abona riba productonan cu bo no ta mira of uza. Tin biaha door di haci e cambionan chikito aki bo ta spaar algun florin.
3. Planea adelanta y duna bo placa un destinacion
Traha un presupuesto ta zona streng, pero kere mi e ta lo contrario. Pa motibo di dicidi di trempan unda bo placa ta bay, bo ta crea un libertad. Cuminsa na traha un presupuesto pa siman pa haci compras y un presupuesto di luna pa bo tempo liber. Bo no mester hacie strak pero toch un poco light. E ta sinti tambe sumamente bon cu bo ta maneha bo placa segun bo mesun limitenan. Bo lo nota cu bo tin mas control riba bo placa cu en bes di priva bo mes di gasta placa.
Sigui tur e consehonan valioso di Balor Consultancy & Consultancy cu Cristina Tromp den Focus Digital Magazine, cu ta accesibel via Apple Store, Android Google Play Store y www.focus.aw (Menu Tab FOCUS DIGITAL)
