SETAR ta orguyoso di continua cu su aporte y colaboracion cu Comision Promove Cultura y Fundacion Cultural di Festival Folklorico pa e Festival un Canto pa Aruba su Himno y Bandera, un tradicion cultural cu ta trece hunto talentonan hoben y adulto rond nos isla pa honra nos Himno y Bandera.
Diamars atardi a tuma luga e trekmento di lot di e secuencia na SETAR Conexion Center, marcando asina e comienso di e ultimo preparacionnan pa e categorianan di Infantil, Hubenil y Adulto. Como Aruba su compania nacional di telecomunicacion, SETAR ta contribui tur aña na eventonan cultural cu ta celebra e identidad, union y creatividad di nos isla. E edicion di e aña aki ta uno special, ya cu Aruba ta celebra 40 aña di Status Aparte, 50 aña di Himno y Bandera y na mes momento 40 aña di SETAR.
SETAR ta desea tur participante, agrupacionnan musical y e comisionnan organisatorio hopi exito cu e preparacionnan. Y ta invita pueblo di Aruba completo pa bin disfruta y celebra hunto durante e Festival cu lo tuma luga diabierna y diahuebs awo na Carnival Village na San Nicolas.
